Leioako udal aholkularitza psikologiko zerbitzuak astean bederatzi ordu eta erdiz egongo da zabalik
Leioako Udal Gizartekintza Sailak erabaki berri duenez, 2007an astean ordu bi eta erdian zabalik zegoen bitartean, aurten bederatzi ordu eta erdiz eskainiko du arreta udal aholkularitza psikologiko zerbitzuak. Gauzak horrela, ordutegi berria hurrengokoa izango da: astelehenetan 9:00etatik 13:30era, eta asteartetan 9:00etatik 14:00etara. Besteak beste, azken Berdintasun Planak islatutako datuak kontutan izan dituzte udal arduradunek zerbitzua areagotzeko. Horien arabera, gero eta lagun gehiagok eskatzen dute aholkularitza psikologikoa, Isabel Garcia Gizartekintza zinegotziaren arabera. Aholkularitza psikologikoko udal zerbitzuaren iazko txostenak ere argia ikusi du jada: datuen arabera, 2007an 20 izan ziren landutako kasuak, horietatik zortzi 2006an eta gainontzeko 12ak iaz zabaldutakoak. Guztira, 102 aholkularitza saio egin ziren.
Zerbitzu horren laguntza eskatzen duten erabiltzaileen profila hurrengokoa dela islatzen dute datuek: 30 eta 40 arteko bizkaitar emakumea, bikotearengatik banandua, seme-alabak gaztetxoak dituena eta langabezian dagoena. Profil horretako erabiltzaileek, zein beste batzuek ere, laguntza psikologikoaren bila joaten dira "Gizartekintza Sailera arazo emozional, lan arazo edota beste arazo pertsonal batzuengatik, hori dela eta antsietate eta estres sintomak izaten dituzte", azaldu du Garciak. Kasu batzuetan, erabiltzailea ezkonduta egon edo seme-alabak baditu, horiekin ere terapia lantzen da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun