Harea poltsikoetan (eremulauak.com-en agurra)
Beste hark idatzita utzi zuen moduan, zimeltzea baino hobe da sutan kiskaltzea. Hiru urte baino gehiago joan dira eremulauak.com sortu genuenetik. Ez da denbora asko; izugarrizko denbora pila da. Erlojua apurtzea erabaki dugu, harea bukatu baino lehen. Agur esateko ordua da.
2004ko bukaeran idazten hasi ginenetik bizi egin gara, iritziak eman, jaso, informatu, gezurrak esan, gaizkiulertu, haserretu. Baina batez ere, barre egin dugu. Eremuari ertzak lautzen pasa dugun denborak lagun asko eman dizkigu, oroitzapen zaporetsuak.
Eta zuri, irakurle, asko zor dizugu. Ehunka, milaka, milioika (hara, hiperbole bat) hurbildu dira eremu lauetara. Hasieran pentsatutakoaren kontrara, erredaktoreekin affaire bat izateko asmoz baino, irakurketa interesgarriren baten bila hurbildu zarete. Gu kulturaren inguruko gure ikuspuntua ematen saiatu gara; heterodoxoa batzuetan, bizarroa bestetan; freskoa, ahal izan den guztietan.
Malko bat dugu begian eta esku bat zuei luzatzeko. Apirilaren 4ean denbora honetan gurekin egon zaretenokin bildu nahi dugu Bilboko Kafe Antzokian, eremua elkarrekin azken aldiz zeharkatzeko. Ediziogunean bidaide izan ditugun Akatu eta Nun taldeek jarriko dute musika, baita bereziki gonbidatu dugun Standstill taldeak ere.
Hau izan da dena lagunok. Sartu azken hondarrak poltsikoetan eta alde hemendik. Ez duzue dunarik aurkituko bidean.
Eremulauak.com webguneko koordinatzaileak
Getxo udalerriko lagunek osatzen duten Nun boskote euskaldunak, Akatu musika talde nafarrak eta Standstill kataluniarrek azken doinua jarriko diote Eremulauak.com webguneari. Izan ere, Eremulauak.com kultur webgune euskaldunaren koordinatzaileek atzo jakitera eman zutenez, ataria gaurkotzen ez jarraitzea erabaki dute, lau hilabeteko geldialdia izan ostean. "Harea poltsikoetan (eremulauak.com-en agurra)" izeneko adierazpenean eskerrak eman dizkiote 2004az geroztik izan dituzten irakurleei. Horrekin batera, apirilaren 4an Bilboko Kafe Antzokian antolatu duten agur jairako gonbitea luzatu dute eta bertan joko dute aipatutako taldeek, webguneak antolatutako copyleft ediziogunean partaide izan direnak. Argazkian, Aitziber, Nun taldeko abeslaria / Nun.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun