Joseba Elorriaga Algortako preso gaztea joan den ostegunean Madrilgo beste espetxe batera eraman zutela jakinarazi du gaur Uribe Kostako Amnistiaren Aldeko Mugimenduak Etengabe bitakoraren bidez: Soto del Realetik Navalcarnerora hain zuzen. "Espetxe aldaketa dela-eta, familiarrek ezin izan dute asteburu honetan ikusi. Navalcarneroko espetxea Getxotik 452 kilometrotara dago", adierazi du errepresioaren aurkako erakundeak. Hortaz, eta azken asteetan Mikel de Gregorio "Degre" Logroñora, Aner Mimenza Caceresera eta Paul Asensio Toledoko Ocaña I espetxera eraman dituztela, Soto del Realen Uribe Kostako zortzi preso daude: urriaren 16an Algortan, Getxon eta Berangon egindako sarekadan atxilotu zuten Lander Labajo gazte algortarra; azaroaren 22an Baltasar Garzon epailearen aurrean aurkeztu ondoren kartzelaratu zituzten Juan Bautista Galdiz "Batis" eta Gorka Oribe; Abenduaren 18an atxilotu zuten Algortan jaio eta Errigoitiko bizilaguna den Marije Fullaondo Batasuneko Mahai Nazionaleko kidea; Urtzi Murueta leioaztarra, Manex Zubiaga algortarra eta Lexuri eta Irantzu Gallastegi ahizpa berangoztarrak. Azken hori, amen moduluan dago, bere alabarekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun