Astrabuduako futbol zelaiko lanetan "gehiegizko atzerapenaz" kexu da Erandioko PP
Astrabuduako futbol zelaiko lanak egiten ari den enpresari, "horiek ahalik eta lasterren amai ditzala eskatzea edo, kasurik egin ezean, zigorra jar diezaiola" eskatu dio Erandioko Udalari Javier Ruiz tokiko popularren bozeramaileak. "Obrak behar bezala egin izan balira, 2006ko maiatzerako amaituta egon behar lukete; baina 2007ko ekainera luzatu zuten epea. Hala ere, sei hilabete baino gehiago igaro direnean, Udalak ez du inolako neurririk hartu", azaldu du PPko buruak. Bere hitzetan, egoerak "eragozpen ugari" eragin dizkie herriko futbol taldeei, oraindik zelaia erabili ezin izan duen Astrabuduako tartean. Horretaz gain, "atzerapenek obren hasierako prezioa %60 gora egitea ekarri dute. 6.000.000 euro baino gehiagoko kostua izango dute instalazioek", Ruizek aipatu duenez. Argazkian, Ruiz popularra prentsaurrekoa ematen.
Javier Ruiz Erandioko PPko bozeramaileak azaldutakoaren arabera, dekretuz erabaki zuen 2004ko azaroaren 5ean Mikel Arieta-araunabeña alkateak, Astrabuduako futbol zelaia eta instalazio osagarriak egiteko lanak Enusa Industrias Avanzadas eta Teconma enpresei ematea; 2.973.000 euroko zenbatekoan eta obrak amaitzeko 18 hilabeteko epea jarriz. "Ondoren, hasierako egitasmoa aldatzea erabaki zuten 2006ko uztailaren 27ko udal batzarrean, Alderdi Popularra aurka zutela. Proiektura bideratutako diru kopurua 1.662.000 eurotan handitu zuten, arazo geologikoak zeudela argudiatuta; gure ustez, Udalaren arduragabekeriak eragin zituen horiek", tokiko popularren buruak gaineratu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun