Getxoko Udal Gobernu Taldeak aste honetan onartu du udalerriko familia ugariei 80.000 euro ematea diru-laguntzen bidez, gaur goizean Imanol Landa alkateak aurreratu duenez. "Diru kopuru hori egun udal tasa eta zergetan aurreikusitako 36.000 euroko hobariei gehitzen zaie. Modu honetan, guztira, 2008an 116.000 eurorekin sustatuko ditu familia ugariak Getxoko Udalak", gaineratu duenez. Tokiko arduradunanen hitzetan, Getxo da Euskal Autonomia Erkidegoan ezaugarri horietako zuzeneko diru-laguntzak indarrean ipiniko dituen lehenengo udalerria. Landak esan duenez, "joan den urrian hartutako konpromisoarekin dago lotuta erabakia, hau da, udalerriko familia ugariak sustatzeko erabakiarekin eta horretarako Hirukide, Kide Ugariko Familien Elkarteetako Euskadiko Federazioarekin egin dugu lan". Argazkian, udaletxea.