Ibai Aginaga berangoztarra beste kartzela batera eraman dute
2008ko ots. 7a, 09:42
Ibai Aginagaren etxekoek jakin izan dutenez, atzo beste nonbaitera eramateko atera zuten Ocaña I (Toledo) espetxetik preso politiko berangoztarra. "Oraindik ez dakite nora eraman dute baina", zehaztu du Uribe Kostako Amnistiaren Aldeko Mugimenduak Etengabe bitakoraren bitartez. Aginaga 21 urteko espetxe zigorra betetzen ari da, ETAren Irunberri komandoko (Nafarroa komandoa zena, polizia iturrien arabera) kide izatea leporatuta. 2003ko uztailan atxilotu zuten, Urretxuko Josega Segurolarekin batera, Dabid Zebrianen etxean, Berriozarren. Polizia iturrien arabera, "lehergaiak, arma ugari eta munizioa eta bonbak egiteko gaiak" atzeman zizkieten; baita dokumentazioa ere. Alcalan (Madril) eduki ostean, 2005eko uztailean eraman zuten Ocaña I espetxera berangoztarra. Argazkian, Ibai Aginaga preso politiko berangoztarra.Aginaga, Segurola eta Zebriani 2005eko urtarrilaren 13an egin zieten epaiketa Espainiako Auzitegi Nazionalean. Hasierako bientzat 21 urteko espetxe zigorra eskatu zuen fiskalak, ETAren Irunberri komandoko (Nafarroa komandoa zena, polizia iturrien arabera) kide izatea leporatuta. Azkenekoari, berriz, zortzi urteko espetxe zigorra, ustez aipatu egituran laguntzaile izateagatik. Fiskalaren ustez, "froga nahikoak" zeuden "hirurak etakideak direla esateko". Hirurek deklaratzeari uko egin zioten. Baina, horien aurka egiteko zortzi lekuko aurkezteaz gain, atxilotuak izan ziren garaian egindako deklarazioak irakurri zituen fiskalak, "zeinetan talde armatuko kide direla" aitortzen zuten, magistratuaren hitzetan. Amnistiaren Aldeko Mugimenduak, aldiz, "horiek, bost egunez inkomunikatuta egon zirenean hartuak" izan zirela adierazi zuen, eta "baliogabetzat" jo zituen, hiru gazteak askatzea aldarrikatuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun