Avanzadako auziaren kontura Eusko Abertzale Ekintza kriminalizatzen ahalegindu da Leioako alkatea

Erabiltzailearen aurpegia Ukberri 2008ko ots. 7a, 20:23
Eneko Arruebarrena Leioako alkate jelkidea "haserre" agertu zen joan den asteartean, "PPk eta Batasunak, edo Eusko Abertzale Ekintzak (EAE), Avanzada estaltzea eta (horren gainetik) oinezkoen pasabidea egitearekin fede txarrez lotzen" ari direlako, "batak bestearekin zer ikusirik ez duenean". Hitzik gogorrenak abertzaleei zuzendu zizkien: "Estortsioa, bahiketak eta erailketak zuritzeko inolako lotsarik ez dutenei, are gutxiago kostatuko zaie gezurrak justifikatzea", adierazi zuen udal agintariak. Arruebarrenak gogoratu zien 1998ko azaroan Avanzada aldameneko bideak asfaltatzea, lubaki tarteak estaltzea eta lurpeko pasabideak gainetiko beste batzuek ordezkatzea onartu zuen, aho batez, udalbatzak. "PPk eta Euskal Herritarrek ere oniritzia eman zioten horri", gaineratu zuenez.
Dagoeneko aldameneko bideak konponduta daude eta lehenengo oinezkoen pasagunea –Bidekurtzion– eraikitzen ari dira, alkateak nabarmendu zuenez. Aste Santuan amaituko omen dituzte lanak. Errepidea estaltzeari dagokionez, "1998ko abenduaren 30ean horren gaineko azterlana agindu zen. Sei hilabete geroago, berriz, Bizkaiko Foru Aldundiarekin harremanetan hastea eta aipatu azterketa ingeniaritza enpresa bati eskatzea onartu zen berriro aho betez, udal osoko bilkuran. Baina Mont Blanc-en ezbeharra gertatu eta gero ezarritako segurtasun baldintzek (aireztapena eta ebakuazioa) bideraezina bihurtu zuten txostena", Arruebarrenaren hitzetan. Bestalde, "2005ean, aldameneko bideak asfaltatu eta Avanzada estaltzeko proiektua eratzeko hitzarmena sinatu zen Aldundiarekin". Udal agintariaren arabera, "600 metro tapatzea eta soinu inpaktua gutxitzeko pantailak jartzea aurreikusten du horrek". Avanzada guztiz estaltzea, ordea, "epe laburrera bideraezina" dela dio Leioako alkateak, "trafikoa desbideratzeko saihesbidea jarri beharko litzatekeelako".
Politika Leioa
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun