Sutea izan da Leioako Luis Bilbao Libano kaleko etxebizitza batean
2008ko ots. 8a, 18:29
Sutea jazo da gaur goizean Leioako Luis Bilbao Libano kaleko 19. atarian, kalte ekonomikoak eragiten baina inolako zauriturik suertatu gabe. Alarma goizeko 9:45ak aldera piztu da, eraikin horretako hainbat auzokidek plastiko errearen usaina nabaritu eta etxean zehar nondik irten den bilatu ostean, lehenengo solairuko ate batean topatu dutenean iturburua. "Hor bakarrik dagoen andra bat bizi da, iaz arte ahizparekin bizi zen baina hori hil zen" azaldu digu kalera batan irten behar izan den auzokideak. Udaltzainei abisua emanda, beraiekin hurbildu dira suhiltzaileak eta medikuak, azken horien beharra ez dela izan. Inguruko pisuak hustu ostean, atea "filmetan bezala, plastiko zati batez" ireki dute eta gela batean aurkitu duten sua itzali eta pisua aireratu dute. Geroago udaltzainek azaldu dutenez, piztutako kandelaren bat bideo zinta kutxa baten gainera erortzean sortu ei da sua.Dena den, kutxa hori erretzea eta keak hormak belztea baino ez du eragin suak. Auzokideek gogoratu dutenez, "emakume horrek hainbat arazo izan ditu argiarekin eta guk Iberdrolara deitzeko esan genion baina, azkenean, makina bat kandela jarri ditu bere etxean". 12:30ean bukatu da auzokideentzat suhiltzaileek emandako "ikuskizuna" eta ordu horretan heldu da kaltetutako etxeko jabea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun