Euskadiko Gazteriaren Kontseiluaren komunikatua:
EHAK eta EAE alderdi politikoen ekintzak bertan behera uzteko erabakiaren aurrean eta alderdi hauen zenbait agintari talde armatuaren laguntzaile legez auziperatuta izan ondoren, beste alderdi batzuk jasandako ilegalizazioetan bezala Euskadiko Gazteriaren Kontseiluak honakoa aditzera eman nahi du:
• Giza Eskubideei diegun errespetu eta babesetik abiatuta, elkarrizketarako eta elkar ulertzerako bideen aldeko apustua egiten dugu. Era berean, Alderdien Legearen aplikazioak ekar ditzaken ondorio posibleen aurrean gure egoneza azaldu nahi dugu. Alderdien lege honek euskal hauteslegoaren zati handi bat adierazpen politiko barik utzi dezake eta oraindik ere bizi dugun egoera sozial eta politikoa tentsioz josi eta muturrera eraman dezake. Hori dela eta zenbait erakunde politiko legez kanpo uzteko une honetan indarrean dauden ekimenak gaitzetsi nahi ditugu eta ekimen hauek eten eta atzera bota daitezen eskatzen dugu.
• EGK-k alderdi politikoei eta gobernu ezberdinei ideia guztiek, proiektu guztiek eta pertsona guztiek tokia izango duten indarkeriarik eta bazterketarik gabeko gune baten alde lan egin dezaten eskatzen die.
Bilbon 2008ko otsailaren 11n
Euskadiko Gazteriaren Kontseilua
Erakunde politikoak legez kanpo uzteko ekimenak atzera botatzea eskatu du EGKk
Araba, Bizkaia eta Gipuzkoako gazte erakunde andana batzen duen Euskadiko Gazteriaren Kontseiluak bere "egoneza" agertu du "EHAK eta EAE alderdi politikoen ekintzak bertan behera uzteko erabakiaren aurrean eta alderdi hauen zenbait agintari talde armatuaren laguntzaile legez auziperatuta izan ondoren". EGKk, "giza eskubideei diegun errespetu eta babesetik abiatuta", elkarrizketa eta elkar ulertzerako bideen aldeko mezua zabaldu du. Era berean, Espainiako Alderdiaren Legeak "euskal hauteslegoaren zati handi bat adierazpen politiko barik" utz dezakeela gogoratu dute eta kontseiluaren iritziz horrek "oraindik ere bizi dugun egoera sozial eta politikoa tentsioz josi eta muturrera eraman dezake". Hortik abiatuta, "zenbait erakunde politiko legez kanpo uzteko une honetan indarrean dauden ekimenak gaitzetsi" eta ekimen horiek eten eta atzera bota daitezela eskatu dute. Azkenik, proiektu politiko guztiak bermatuko dituen indarkeriarik eta bazterkeriarik gabeko eremu baten alde lan egin dezaten eskatu diete alderdi eta gobernuei. Argazkian, ertzain bat EAEren kartel bat zapalduz, atzo Bilbon.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun