Getxoko epaitegiko, ertzain etxeko eta Begoña jauregiko aldaketen berri emateko ordu erdiko saio bana eskaini diete auzotarrei
Getxoko Udalak hainbat batzar antolatu ditu, gaur arratsalderako, Hirigintzako Antolaketarako Plangintza Orokorrean (HAPO) behin-behinean onartutako hainbat aldaketen berri emateko. Horrenbestez, saioak udaletxeko batzar areto nagusian egingo dira. Lehenengoa, udal iturrien arabera, "etorkizunean herritarrei gero eta zerbitzu hobeagoa eman ahal izateko", Justizia Jauregia handitzeko lanei buruzkoa izango da, 18:00etan. Bigarrenean, berriz, epai bat bete ahal izateko, Sarri esparruari dagokion ordenantza baten aldaketari buruz arituko dira, 18:30ean. Ordu erdi beranduago, Begoñako gazteluko hotela izango da gaia; eta azkenik, 19:30etik aurrera, ertzain etxea handitzeko lanez jardungo dute. Horietako bakoitzari alegazioak aurkezteko epea otsailaren 29ra arte egongo da zabalik. Bestalde, Tokiko Gobernu Batzak Getxoko arkitektura-elementu adierazgarrien Babeserako Plan Berezia behin-behinean onetsi du. Argazkian, Joseba Arregi Hirigintza, Obra eta Zerbitzu zinegotzia.
Egungo epaitegia "gainezka" dagoela ikusita, Getxoko Justizia Jauregia handitzea erabaki zuen Eusko Jaurlaritzak. Gauzak horrela, hiru areto berri jarri nahi dituzte, San Inazio herri ikastetxera begira eraikin erantsia altxatuz eta, horrela, instalazioen azalera %40 hedatuz. Horretaz gain, bereizitako bi sarrera egin bahi dituzte: bata jendearentzat eta bestea epaile eta funtzionarioentzat. Udal iturrien arabera, "azkar samarra" izango da HAPOren aldaketa behin betiko onartzea. "Baliteke sei hilabetetan hastea lanak", tokiko agintarien arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun