Dozenaka lagun identifikatu ditu Ertzaintzak eskualdean
2008ko ots. 14a, 17:12
Herrizaingo Sailak jakinarazi duenez, Bizkaian eta Gipuzkoan 24 lagun atxilotu eta pertsona bat zauritu ditu Ertzaintzak, LABek eta hainbat eragile soziopolitikoek deitutako greba orokorrean "kale istiluak edo autoritatearen aurkako erasoak" egitea leporatuta. Atxilotuen eta egoeraren inguruko datuak zabaldu ditu Askatasunak. Uribe Kostan, ordea, ez da atxiloturik egon, baina bai dozenaka identifikazio. Horrela, Algortan hainbat laguni hartu dizkiete datuak kartelak jartzeagatik eta Leioan enpresetan langileekin hitz egiteagatik. Sopelan, pikete informatiboei ere eskatu diete dokumentazioa baina ertzainak ez dira tematu eta alde egin dute agiririk gabe. Erandion ere berdin jokatu dute 90 pertsonek egindako eltze-zalapartan eta Itzubaltzeta / Romon, aldiz, pilota jaurtigailuak uneoro eskuan, grebaren aldeko propaganda banatzen ibili den hainbat pertsonaren atzean joan eta gelditu dituzte paperak eskatzeko, dozena bat guztira. Gauza bera egin dute 150 bat lagun bildu dituen manifestazioaren buruan zeudenekin, Areetako Xake plazan eseraldia egin dutenean.Baina horien guztien aurretik, Algortan, goizeko 6:30etik aurrera ibili dira hainbat polizia auto eta furgoneta herria patruilatzen eta goizean zehar ertzainak hainbat pertsona jarraitu dituzte, batzuetan sartu diren denda barruraino, "era txarrean, oldarkor, ea neskak propaganda banatzen ari ziren, ez dakit zeren susmagarriak izango balira bezala", azaldu dio UKBERRI.NETi denda bateko behargin batek, ikusitakoa ikusita lana egiteari utzi diona eta eguerdian 250 lagun batu dituen elkarretaratzera gehitu dena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun