Gaurko greba egunaren karira Itzubaltzeta / Romon jazotakoa laburbilduz, prentsa oharra zabaldu du Segi gazte erakundeak. Jakinarazi duenez, goizeko 8etan ekin diote 20 bat lagunek kartel, pankarta eta pegatinekin "herria aldarrikapenez jozteari". Alabaina, handik ordu laurdenera, Ertzaintzaren "bi patruila auto agertu eta bildutakoen atzetik segika hasi dira", salatu dute gazteek. Handik gutxira, "polizia sekretu bi kotxe, ertzainen furgoneta bat eta beste bi patruila auto" izan dira agertu direnak. Lehenengo hiru lagunak identifikatu dituzte orduan. Segik jarraitu duenez, "8:30etik aurrera, berriz, bildutako lagunek nola edo hala alde egin ostean, multzo guztien atzetik eta herri osoan zehar atzetik segika izan ditugu. Patruiletan kontrako norantzan eta jarrera erasokorrean aritu dira". Ordutik aurrera "etengabeak" izan dira identifikazioak. Eguerdian 150 herritar batu dituen manifestazioan ere datuak eskatzen hasi dira ertzainak. "Azkenerako, 15 identifikazio burutu dituzte", dio gazte erakundeak. Bestalde, herrian saltokien %80k ateak itxi dituela adierazi dute. Aspaldiko partez Romo-Artatza institutuak ere ez du eskolarik eman, Zuzendaritzak eskatutako izapide guztiak eginda, ikasleek grebaren alde bozkatu ostean. Argazkian, manifestariak Areetako kaleetan barrena.
Hala ere, Araba, Bizkaia eta Gipuzkoako Polizia autonomikoaren saiakerek ez dute grebalarien jarduna geldiarazi. Lehenengo identifikazioen ostean, 10:15ean, berriro ekin diote dendaz denda joateari 50 laguneko talde bakar batean. Eta orduan ere eta, eguerdira bitartean, "furgoneta bat atzetik segika" izan dute eta "behin baino gehiagotan" datuak eskatu dizkiete. 12:00etarako, berriz, manifestazioa zegoen deituta, Itzubaltzetako Kolas plazatik abiatuta. "Pankartarik gabe, kartelak eskuan eta ozen oihukatuz", Areetako Xake plazaraino heldu dira eta, bertan, eserialdia egin dute, berriz ere jendea identifikatzeari ekin diotenean. Horren ostean, 13:00etan, Algortan deituta zegoen eskualde mailako manifestaziora abiatu da jendea. Arratsaldean ere berdin jarraitzen du kontua Itzubaltzetan lekukoek UKBERRI.NETi adierazitakoaren arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun