Torturaren Aurkako Egunean udaltzainek izandako jarrera "harroputza" salatu du Leioako ezker abertzaleak
Torturaren Aurkako Eguna zela eta, herenegun (otsailak 13), erakusketa jarri zuten Leioako Boulevardean bertoko ezker abertzaleko kideek. Torturak antzezten zituzten panpinez eta azalpen panelez osatuta zegoen hori. "Bat-batean, udaltzainak inguratu eta erakusketa kendu behar genituela esan ziguten, alkatearen agindua zela. Beste argudioen artean, erakusketak kalea oztopatzen zuela adierazi zuten", azaldu dutenez. Hori "gezurra" izateaz gain, "gai politikoetan esku sartzen" ari zirela erantzun zieten tokiko poliziei ezker abertzalekoek. Hots, "beraien egitekoa gainditzen" ari zirela. Salatu dutenez, "uneoro, jarrera harroputza erakutsi zuten" udaltzainek. Azkenean, erakusketa kendu behar izan zuten. Argazkian, Leioako ezker abertzaleko kideak udaletxeko eskailera pean prentsaurrekoa ematen aurreko batean / Gaztesarea.
Herenegun gertatutakoa "kontu isolatua ez" dela salatu du Leioako ezker abertzaleak. "Azken hilabeteotan gure aurkako jarrera gogortu du Udaltzaingoak. Iragan astean ere, erakusketa berbera kendu zuten eta zaborretara bota zuten. Horregatik, zaintza txandak egin genituen", azaldu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun