Sopelako udal iturriek prentsa ohar bidez zabaldu bezala, Eusko Abertzale Ekintzak (EAE) eskatutako eskubideak "bermatuta" daudela adierazi zuen Gonzalo Garcia Ogasun, Administrazio eta Giza Baliabide zinegotziak, ostiralean egindako ez ohiko osoko bilkuran, ekintzaileek aurkeztutako mozioari tokiko gobernuko buru EAJk emandako ezezkoa justifikatzeko (PSE-EEk eta PPk ere aurka bozkatu zuten eta, EB eta EA abstenitu ziren. Eta Berdeek, aldeko botua eman). "Eudel, Euskal Udalerrien Elkartearen arabera, Espainiako Auzitegi Nazionaleko 5. aretoaren zein Auzitegi Gorenaren ebazpenek ez dute eraginik hautetsien jarduera, udal talde, finantzazio edota lokalen erabilerarengan", aipatu zuen udal arduradunak. Alabaina, epaiak epai eta konparaketak gorrotagarriak izan daitezkeen arren, besteak beste, Iruñean EAEren udal taldearen aurkako neurriak hartzen hasi dira jada. Uribe Kosta eskualdean ekintzaileek dauzkaten zazpi zinegotzietatik lau sopeloztarrak dira eta gainontzeko hiruak lemoiztarrak. Argazkian, Imanol Garai alkate jelkidea.
Ostiraleko udal batzarrean aurkeztutako idatzian, besteak besteak, udal jardueretan normaltasunez parte hartzea, bere hautetsiak udal erakunde guztietan mantentzea eta, lan egin ahal izateko, orain arteko baliabideak (ekonomikoak barne) izan jarraitzea eskatzen zuten EAEko zinegotziek; baita 30 minutuko elkarretaratzea deitzea eta, independentzia tartean, proiektu politiko guztien zilegitasuna aldarrikatzea ere. Hala ere, Berdeen baiezkoa baino ez zuten jaso ekintzaileek. Ezker Batuak, berriz, EAJk aurkeztutako proposamenari eman zion aldeko botua; eta nahiz eta EAEk eta PPk kontran bozkatu, gainotzekoen abstentzioari esker atera zen aurrera jelkideen idatzia. Horrenbestez, "hauteskundeekiko interesak alde batera utzi eta EAEren aurkako ilegalizazio eskaera bazter dezala" eskatu dio Espainiako Gobernuari Sopelako Udalak; "baita elkarbizitza politikoa bermatzeko neurriak hartu daitezela ere". Baltasar Garzon Espainiako Auzitegi Nazionaleko epaileak EAE eta EHAK alderdien jarduera hiru urtez eteteko aginduari buruz, ordea, hitzik ez. Udal iturrien arabera, "pertsona guztien giza eskubideen urraketarekiko aurkakotasuna eta oinarrizko eskubideen errespetua adierazten du onartutako proposamenak. Horrekin batera, alderdien ilegalizazioa elkarbizitza politikoa normalizatzeko bidea baino, hauteskundeak gainean Alderdien Legea aplikatzearen emaitza dela gaineratzen du".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun