Bi aste luze Gasteizko Txagorritxu ospilalean eman ondoren, asteazkenean eraman zuten berriro Langraitzeko espetxera Anjel Figueroa euskal preso politiko gaixoa, Anjel kalera! herri ekimenak jakinarazi duenez. Bada, kartzelera heldu eta hurrengo egunean, astelehenean (atzo) epaiketa izango zuela jakinarazi zioten algortarrari. Kordobatik iritsi berri zela, azaroaren 29an Langraitzen sortutako liskarraren ondorioz, espetxe funtzionarioak berak jarri dio salaketa, "presoak eraso zuelakoan". Mari Karmen Fernandez euskal errepresaliatuaren amaren ahotan bestelakoa da Figueroaren bertsioa: konortea galdu eta, esnatu zenean, lurrean etzanda eta eskuak loturik aurkitu zuen bere burua. Atake epileptikoa izan zuen algortarrak, kartzeleko arduradunek onartu bezala. Hala eta guztiz ere, funtzionarioari eguneko bi euro ordaintzea eskatzen diote, hilabete eta erdiko epean. "Dirua ere ez da hori. Kontua da beti nahi dutena lortzen dutela azkenean. "Handik hilabete batera ez zuen esan bada tipoak sorbalda minduta zuela", tamaldu da Figueroaren amak.
Kordobatik Langraitzera bueltan ekarri zutenean, sarrera ziegan sartu eta berak beti erabili ahal izan duen flexoa kendu zioten Figueroari, "sartzerik ez zuelakoan". Preso marokoar bat (arabieraz edo frantsesez hitzegiten zuena) eta hezitzailearekin zegoela, azken hori une batez alde egin eta funtzionarioa agertu zen. "Semeak beti esan du zaindariak berak bultzatu eta paparretik heldu ziola. Ziegakideak ere horrela adierazi zuen, epaiketara bidean Anjeli berari baieztatu zionez", azaldu du Mari Karmen Fernandezek. "Kartzeleko itzultzaileak, baina, deklaratu ez zuela adierazi zuen", presoa algortarraren amak salatu duenez. Epaiketan, berriz, ez zioten ezta itzultzailerik jarri ere egin. Judizioa baliogabe deklaratzeko (eta beste berri batera deitu) gutxi falta izan bazen ere sententziaren zain daude orain. Bestalde, Langraitzen bertan Figueroak medikazioarekin arazoak izaten ari dela aipatu du bere amak: "desorduetan eta txarto ematen dizkiote botikak. Gainera, edalontzian zazpi tanta, ez gehiago, ezta gutxiago ere, bota dizkizutela ez baduzu ikusten; nola hartuko duzu, bada, botika", deitoratu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun