Gintonic taldearen kontzertua izango da ostiral honetan, hilak 22, 20:00etatik aurrera, Andres Isasi Udal Musika Eskolan (argazkian). Sarreraren prezioa 4 eurokoa izango da, udal iturri getxoztarrek gaur jakinarazi dutenez. Mario Clavell Larrinaga aipatu eskolako irakaslea eta flauta-joleak sortu zuen taldea, eta bere kideek esperientzia handia dute mundu osoko eszenatokietan. Batez ere jazz musika jotzen dute, baina rocka, musika barrokoa edo tangotik eratorritako soinuak ere interpretatzen dituzte. "Gainera, jotzeko oso zailak diren piezak ere jotzen ausartzen dira. Azken hauek gutxitan entzuten dira eszenatokietan, baina laukotea ausartu egiten da", antolatzaileek adierazi dutenez. Taldeko kideak dira Mario Clavell Larrinaga bera, Jeronimo Martin piano-jolea, Jon Andraka kontrabaxu-jolea eta Edu Lazurtegi bateria-jolea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun