Jabier Gallaga preso algortarrari bonba baten krokisa topatu diotela zabaldu dute
Uribe Kostako Amnistiaren Aldeko Mugimenduak Etengabe bitakoraren bitartez jakinarazitakoaren arabera, El Mundo eta Diario de Cordoba egunkariek asteburuan zabaldu zuten Kordobako espetxe funtzionarioek “bonba lapa egiteko krokis bana" aurkitu zizkietela Jabier Gallaga (Algorta) eta Tomas Insausti (Iruñea) euskal preso politikoei. "Asteburuan bertan etxekoen bisita izan du Javier Gallagak. Berak komentatu dienez egunkariek esandako guztia gezur hutsa da. Ziegak hustu eta dena goitik behera jarri dietela esan zien, eta Tomas Insaustiri telebista osorik desmontatu ziotela ere. Oraingoz ez daukagu berri gehiagorik, baina El Mundok berak zigorrik sartu ez dietela esaten duenez, zaila da sinistea debekatutako ezer aurkitu diotenik miaketetan, are gutxiago bonbak egiteko gidaren bat", adierazi du errepresioaren aurkako erakundeak. Bestalde, Marije Fullaondo espetxez aldatu dutela jakinarazi du AAMk.
Algortan jaio eta Errigoitiko bizilaguna den Marije Fullaondo Batasuneko Mahai Nazionaleko kidea joan zen astean eraman zuten Soto del Realetik (Madril) Villabona (Asturias) espetxera. Fullaondo abenduaren 18an atxilotu zuten Baltasar Garzon Espainiako Auzitegi Nazionaleko epailearen aginduz. "Aiboa Casares Leioako preso politikoa ere Villabonako espetxean dago, Naiara Mallabia eta Aitziber Sagarminaga bilbotarrekin batera", Etengaben zabaldu dutenez. Villabona Algortatik 297 kilometrotara dago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun