SIPVS sindikatuaren arabera, pasa den udan metroan gertaturikoa kontu ezaguna zen metroko langileen artean eta sindikatuak salatzekotan egon ziren, baina azkenean baztertu zuten enpresak eragindako presioak zirela eta.
ELA eta UGT sindikatuek, berriz, segurtasun enpresen lana eta zaindariak kontrola ditzan eskatu diote Metro Bilbaori: "enpresa honek segurtasun arloan egiten duena aurrestea da. Nahiz eta merkatuan jende gehiagorik ez dagoela esan. Gezurra da. Orain metroan jende merkea dago", adierazi dio "Deia"ri Jose Ignacio Torres UGTko ordezkariak ELAk ere, arlo horretan diru gehiago bideratzea eskatu du, "kalitatezko" zerbitzua egongo bada.
Salatzailearen aurka
Salatutakoa guztiz faltsua dela esan du EHUko Leioa eta Erandioko campusean langile eta ikasleen protesten aurka oldartzeagatik ezaguna egin zen Prosetecnisa enpresak. Horretaz gain, mezulariaren aurka jo du, Fidel Gomez Prosetecnisako langile ohia dela gogoratuz eta berak eginiko "guztiz neurriz kanpoko lan eta ekonomia eskaera pertsonalak" ez betetzeagatik orain "gorrotoak jota" enpresaren aurka jarduten duela esanez. Gainera, enpresaren aburuz, Gomezek bere gain hartu du SIPVS sindikatuaren ordezkaritza, Kataluniako zentral sindikala dena eta Araba, Bizkaia eta Gipuzkoan "inolako ordezkaritzarik ez duena". Horregatik, "enpresaren eta Metro Bilbaoren irudi ona kaltetzea helburu" duen salaketa gaitzetsi eta auzitegietara jotzeko aukera aztertuko du. Bestalde, "Metro Bilbaok eskatzen dituen kontratazio baldintza zorrotzak" ezagutu eta betetzen dituela dio enpresak.
Metro Bilbaok ere prentsa oharra kaleratu zuen atzo, Prosetecnisa enpresaren oso antzekoa hainbat puntutan. Julio Ibarra komunikazio arduradunak jakinarazi duenez, "dagoeneko Metro Bilbaok etengabeko hobekuntza programaren barruan ikerketa abiatu du".
"Paperik gabeko errumaniarrek" metroko segurtasunaren ardura izan dutela salatu dute
Uribe Kosta eta Erandioko metro geltokien segurtasuna esleituta duen Prosetenicsa enpresa pasa den udako jaietako zerbitzu berezietan guardia lanak egiteko titulaziorik gabeko eta "paperik gabeko etorkin errumaniarrez" baliatu zela salatu zuen atzo SIPVS sindikatuak. "Deia" egunkariak zabaldu duenez, Prosetenicsako langilea zen eta enpresarekin aspaldi auzitan dagoen Fidel Gomez SIPVS bizkartzain, segurtasun guardia eta zinpeko zaindarien sindikatuaren idazkariak salatu du Metro Bilbaon gertaturikoa: "30 bat errumaniar ekarri zituzten Bilbo, Algorta eta Areetako jaietan metroko zerbitzu berezietan segurtasun zerbitzuak indartzeko", Beharginak "Iruñetik zetozen, eraikuntzan lan egiten zuen jendea zen, uniformea, borra eta bilurrak eman zizkieten eta txano bana jartzen zieten bideokameratan ez ezagutzeko". Gomezek dioenez, "arazoren bat agertzean, profesionalak joan behar ginen inork ez baitzuen espainieraz egiten. Eta hori guztiori gaueko 50 edo 60 euroen truke". Gainera, Metro Bilbao jakinaren gainean zegoela salatu du. Prosetecnisak, gezurtatu du SIPVSek salatutakoa. Metro Bilbaok azalpenak eskatu dizkio segurtasun enpresari eta ikerketa egingo duela zabaldu du. Gomez auzitara eramatea ere ez du baztertzen, ordea. Argazkian, zaindari bat Bilboko geltoki batean, artxiboko irudi batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun