Hurrengo lauhilekoan bost ikastaro berri eskainiko du Getxoko Gazteria Zerbitzuak
2008ko ots. 22a, 11:31
Martxotik ekainera bitartean, 13 tailer eta ikastaro eskainiko ditu Getxoko Udal Gazteria Zerbitzuak. Horien artean, gainera, orain arte eman ez dituztenak ere badaude: surfa, txalaparta, perkusioa, kajoi flamenkoa eta sabel dantza, hurrenez hurren. Ikastaro bakoitzak 5 euro kostatzen du eta 8 eta 30 urte bitartekoei zuzenduak daude, kontuan izanda noski ikastaro bakoitza zer nolakoa den. Horrenbestez, udal webgunean, Gazte Bulegoan (Tangora Etxea. Algortako Etorbidea, 98), 944 660 353 telefono zenbakira deituz edo gaztebulegoa[abildua]getxo.net helbide elektronikora idatziz izena eman daiteke. Azken horren bidez, norberaren izena eta egin nahi den ikastaroa aipatu beharko dira eta telefono zenbaki bat eman. Horretaz gain, SMS bat ere bidal daiteke telefono zenbaki honetara: 667 600 740. Argazkian, hainbat neska-mutil blues eta jazz inprobisazioa ikasten.Bestalde, 2007an egindako ikastaroei jarraipena emango diete. Horiek 10 urte baino gutxiago dituztenei zuzenduak daude. Hoirien artean daude skate (arrakasta handia izan du) eta surfean aritzen ikastekoak. Hori bai, adingabekoek gurasoen baimena eskatu behar dute. Sukaldaritza, argazkilaritza eta kantu tailerrak ere berriro egingo dituzte. "Aurrekoetan bezala, hizkuntza kontuan hartu da", udal iturrien arabera, eta ikastaro gehienak euskaraz eta gaztelaniaz eskainiko dira. Horrela, 13 ikastaro eta tailerretatik 3 erdara hutsean izango dira eta beste hamar "gazteleraz eta euskaraz". 2007an, "gazteleraz edota euskaraz" eman behar zituzten ikastaroetako batzuk, azkenean, erdaraz baino ez zituzten eman, irakasle erdalduna zelako edo ikasle gutxi zirela aitzakiatzat hartuta. Mugikortasun eta entzumen arazoak dituztenei ere erraztasunak eskainiko zaizkie.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun