Antena Ez elkarteak manifestazioa deitu du igande honetarako, otsailak 24, eguerdiko 12etan, Areetako Eskoletako plazatik abiatuta. Izan ere, Getxoko Udalak herri horretako Paulino Mendibil eta Andres Larrazabal kaleen artean jarritako telefonia antenaren gaineko auzia konpontzeko "benetako borondaterik ez" duela uste du kolektiboak. Egun zigilatuta dago antena horretako erregistro-kutxa, geldirik beraz. Alabaina, neurria "orduz kanpokotzat" jotzen dute Antena Ez elkartekoek: "Modu ilegalean jarri zuten 2007ko abenduaren 11an azpiegitura, Udalbatzarrak udalerrian antenak jartzeko baimenak emateari utzi eta denbora baterako luzamendua ezartzea aho batez onartu eta gutxira. Alkateak eta udal gobernuak hori bete zein ez betetzeko zilegitasuna badute, kalera ateratzea baino ez zaigu gelditzen euren jarrera birpentsatu dezatela eskatzeko", azaldu dute. Argazkian, antenen aurkako kartelak Paulino Mendibil kaleko etxebizitzetako leihoetan / Antena Ez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun