Asteartean (otsailak 19) abiatu zen Bertsolari Gazteen XVI. BBK Sariketa, Igorren, Ipar Uribe eta Arratia arteko norgehiagokarekin. Eta hurrengo egunean izan zen bigarren saioa Busturialdeko Arratzun, tokiko eta Durangaldeko ordezkarien artean. Bizkaiko Bertsolari Elkarteak azaldutakoaren arabera, sariketa honetan parte hartzen duten 6 taldeak, 3 taldeko multzo bitan banatzen dira eta liga bat jokatzen dute haien artean. Horrenbestez, oraintxu Ipar Uribe buru den taldean Lea Artibairi falta zaio bakarrik lehian hastea. Beste multzoan, berriz, etxekoek irabazi zuten Arratzuko saioa, oraindik Bilboaldea jokatu barik dagoela. Talde bakoitzak saio bitan kantatzen du, bata “etxean” (euren eskualdeko ikastetxe batean) eta bestea “kanpoan”. Horrenbestez, otsailaren 29an, ostiralarekin, izango dute ligaxkako bigarren eta azken saioa Imanol Uria, Maialen Markaida eta Jone Uria, 18 urte arteko kategorian; eta Arrate Illaro, Peru Vidal eta Itxaso Paya 19 eta 24 urte bitartekoetan, Derio Txorierri BHI institutuan, 12:15ean. Bilboko Kafe Antzokian, martxoaren 14an jokatuko den finalean egon ahal izateko, bigarren puntua erdiestea izango da seion helburua.
Igorreko saioa
Joan den asteartean, Igorreko institutuko aretoa bete-bete egin zuten ehun bat lagunek, Arratiko eta Ipar Uribeko taldeen arteko saioa ikusteko. "Norgehiagoka maila handikoa izan zen, puntuazioak erakusten duen moduan (Ipar Uribek 423 puntu eta Arratiak 383,5 puntu) eta ikusleek oso ondo pasatu zuten", Bizkaiko Bertsolari Elkarteak adierazi duenez.
Itxaso Paya izango du ordezkari Uribe Kostak biharko Abra Sarian
2008ko ots. 22a, 18:57
Algortako Bertsolari Eskolak (ALBE) antolatuta, larunbat honetan, otsailak 23, jokatuko da zazpigarren urtez Abra Saria. Aurrekoetan bezala, Euskal Herri osotik etorritako sei bertsolari gazte arituko dira norgehiagokan, aurtengo txapela lortzeko, Areetako Andres Isasi musika eskolan 19:00etatik aurrera egingo den saioan. Izan ere, bertsolari belaunaldi berriei bultzada ematea du helburu lehiaketak. Itxaso Paya algortarra izango da Uribe Kosta eskualdeko ordezkaria eta hainbat zalek beregan jarri dute konfiantza bere abaia Xabik 2004an lortutako txapela berreskuratuko duelakoan. Horretarako, Gillen Hiribarren (Itsasu), Karmele Mitxelena (Oiartzun), Aimar Karrika (Auritz), Alazne Untxalo (Ituren) eta Eñaut Urubururekin (Abadiño) jokatu beharko du garaikurra algortarrak. Bestalde, berri onak datozkigu Bertsolari Gazteen XVI. BBK Sariketatik: Itxaso Paya bera lehian dabilen txapelketako hasierako saioan lehenengo puntua eskuratu zuten Ipar Uribeko ordezkariek. Martxoaren 14ko Bilboko finalera bidean saio bakarra falta zaiela, aurrea hartu dute eskualdekoek. Iaz Ipar Uribek jantzi zuen txapela. Argazkian, goiko lerroan, Arrate Illaro, Itxaso Paya eta Jone Uria eskualdeko ordezkariak 2004an Gernikan / Jone Uria.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun