Iluntzeko zazpiak aldera eman zitzaion hasiera, larunbatean, VII. Abra Sariari, Areetako Andres Isasi musika eskolan. Entzule 40 lagun inguru eta argazki kamera ugariren flashak dizdiraka zituztela, lehenengo atalari ekin zioten sei bertsolari gazteek: ofizioa zortziko nagusian binaka (hiruna bertso) lehendabizi, zortziko txikian ondoren; eta azkenik, bakarta aritu behar izan ziren seiak puntu biri erantzun eta gai bati bertso bi. Akatsen bat gora behera, nahiko paretsu ibili zen seikotea. Alabaina, txukunen Gillen Hiribarren eta Karmele Mitxelena aritu zirela erabaki zuten epaile lanetan jardun zuten Martin Aramendik, Iñaki Aurrekoetxeak, Mirari Azulak eta Asier Ibaibarriagak. Hartara, bi horiek izan ziren finalera heldu zirenak.
Buruz buru
Buruz burukoan, ofizioaren ostean, kartzelako lanari ekin behar izan zioten Gillen Hiribarren eta Karmele Mitxelena: neska oiartzuarra lehendabizi eta Itsasuko mutila ondoren. Lehenengo bertsoan -neurri eta doinu librean, entzuleengan eman zitzaien sentsazioa sorrarazi behar zuten- nahiko parekatuta ibili ziren, baina bakarko gaian ez zuen guztiz asmatu Hiribarrenek eta, azkenean, Mitxelenak jantzi zuen txapela.
Algortako Bertsolari Eskolak (ALBE) antolatuta, larunbat arratsaldean (otsailak 23) jokatu zen zazpigarren urtez Abra Saria. Aurrekoetan bezala, Euskal Herri osotik etorritako sei bertsolari gazte aritu ziren norgehiagokan, aurtengo txapela lortzeko, Areetako Andres Isasi musika eskolan. Izan ere, bertsolari belaunaldi berriei bultzada ematea du helburu lehiaketak. Ia hiru ordutako saioaren ostean, Karmele Mitxelena oiartzuarra nagusitu zitzaien Gillen Hiribarren (Itsasu), Aimar Karrika (Auritz), Eñaut Uruburu (Abadiño), Itxaso Paya (Algorta) eta Alazne Untxalori (Ituren) -horrela sailkatu ziren-. Bestalde, ostiral honetan izango du Bertsolari Gazteen XVI. BBK Sariketaren ligaxkako bigarren eta azken saioa Ipar Uribek (Imanol Uria, Maialen Markaida eta Jone Uria, 18 urte arteko kategorian; eta Arrate Illaro, Peru Vidal eta Itxaso Paya 19 eta 24 urte bitartekoetan) Lea Artibairen aurka. Derioko Txorierri BHI institutuan izango da ekitaldia, 12:15ean. Argazkian, Karmele Mitxelena oiartzuarra, txapela buruan eta Abra Saria eskuan, azken agurra kantatzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun