Ken Zazpiren lehen lana, "Atzo da bihar", 2001ean irten zen plazara. Bi urte beranduago, "Bidean" diskoak 18.000 kopia saldu zituen. Bigarren lan hori aurrekoa baino trinkoagoa izan zen baina, aurrekoetan bezala, konpromiso hitzak erabiltzen zituen, beraiekiko eta beraien inguruarekiko konpromisoa azalduz, eguneroko kezkak eta egoerak deskribatzen zituztelarik, baita sentimendu sakonenak ere. Entzun eta norberak ulertu eta sentitzeko letrak ziren.
Gernikarrek "Gelditu denbora" bere hirugarren diskoa akustikoan eta zuzenean grabatu zuten: aurreko lanetik zazpi kanta birmoldatu eta sei kanta berri gehitu zituzten. Gainera, zuzeneko lan horren bi edizio egin zituzten, bata euskaraz eta bestea, berezia, katalanezko bi kanta biltzen zituena.
Ken Zazpi musika talde euskaldunak kontzertua eskainiko du bihar, asteazkena, goizeko 12etan Leioa eta Erandioko campuseko areto nagusian. Gernikarrek "Argiak" bere laugarren eta oraingoz azken diskoa aurkeztuko dute EHUko Asteazken Kulturalen zikloaren barruan, eta egitarauko gainerako jardueretan bezala, sarrera doan izango da eta bertaratu nahi duten guztientzako zabalik egongo da. Lan berria Donostia eta Los Angelesen grabatu zuten bizkaitarrek pasa diren irailean eta urrian eta Durangoko Euskal Disko eta Liburu Azokaren harira estreinatu zuten. Bertan, Joseba Sarrionaindia idazlearen letrak, Cheche Alararen teklatua, Joe Gastwirten masterizazioa eta Rafa Sardina bermeotarra eta mundu mailako ekoizlerik ezagunenetarikoaren eta Haritz Harreguyren produkzioa, soinu ingeniaritza eta grabazioak izan dituzte bidelagun. Guztira, hamabi abestik osatzen dute aurkeztuko duten diskoa. Argazkian, taldea "Gelditu denbora" aurreko diskoaren grabazioan / Gaztesarea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun