“Uribekostarroi ere planto egiteko garaia heldu zaigula" aldarrikatu dute Sopelan
“Euskal Herriak independentzia. Abstentzioa” leloa eurena eginez, 120 bat lagun batu da gaur iluntzean, Sopelako Udaletxe plazan, ezker abertzaleak deitutako ekitaldi politikoan. “Inposatu diguten salbuespen egoeraren” eta EAJk egin nahi duen “iruzur berriaren” aurrean, “aukera bakarra abstentzio aktiboa” dela aldarrikatu dute bertan. Hain zuzen ere, “hipokritatzat” jo dute “tokiko alderdi erregionalista”: “Botoa zor diegula esan eta Madrilera eraman nahi gaituzte, hemen gure ahotsa errespetatzeko ere gai izan ez direnek”, adierazi dute abertzale eta ezkertiarrek. Are gehiago, “negozioa egin eta euren patrikak betetzeko asmoz”, azken 30 urteotan, “unean uneko gobernuarekin itunak egitea” leporatu diete jelkideei. Horrenbestez, “planto egin” eta martxoaren 9an “hautestontziak hutsik” gera daitezela ahalbidetzeko eskatu diete uribekostarroi. Bestalde, aurretik, propaganda banatzen ibili dira inguruan Jon Sustatxa eta Felix Gonzalo Espainiako Kongresu eta Senaturako Ezker Batuko hautagai bizkaitarrak. Argazkian, Ziortza Ruiz Sopelako Eusko Abertzale Ekintzako (EAE) zinegotzia gaurko ekitaldian.
Hitza hartu bezain laster, “salbuespen egoerak” Uribe Kosta eskualdean izandako eraginak zerrendatu ditu Ziortza Ruiz Sopelako Eusko Abertzale Ekintzako (EAE) zinegotziak: batetik, azken udal hauteskundeetan Barrikan, Berangon, Erandion, Getxon, Gorlizen, Leioan, Plentzian eta Urdulizen EAEko zerrendak legez kanpo utzi zituztela gogoratu du hautetsiak. Bestalde, “errepresioaren ondorioz”, urriko sarekadan Algortan, Berangon eta Getxon atxilotu eta espetxeratutako gazteen izenak aipatu ditu Ruizek. Oraindik orain, preso jarraitzen dute Lander Labajo, Aner Mimenza, Gorka Oride, Batis Galdiz, Joseba Elorriaga eta Mikel de Gregorio; baita Algortako alaba eta Errigoitiko bizilaguna den Marije Fullaondo Batasuneko mahai nazionaleko kidea, Paul Asensio 18/98ko auzipetu algortarra, Saioa Santxez berangoztarra eta eskualdeko hainbat herritarrek ere. Horrekin batera, “Uribe Kosta erdaldundu eta zementuz bete, gazteak uxatu, Lemoizen mamua bere horretan mantendu zein herritarron partaidetza bere kaxa erabili edo baztertu nahi dutenei bozka bat bera ere ez” emateko eskatu du ezker abertzaleko ordezkariak. Ildo horri jarraituz, “herri honen biziraupena bermatzeko modu bakarra independentzia” dela aldarrikatu du ondoren hitza hartu duen Galder Olivares Igorreko alkateak. Horri ekiteko, “abstentzio aktiboa” eskatu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun