Galdapen hauek, laburtuz, hiru ildo nagusitan argudiatu dituzte: lehenik eta behin, "ez da agertu aldaketa hauek justifikatzen duen argudio teknikorik. Hedabideetan gehien zabaldu den argudioa bera ere (galerien kontserbazio egoera txarra), ez da inondik inora azaldu aldaketa hauek jendaurrean agertu direnean. Dena mugatzen da prentsako adierazpenetara, non beste iritzi batzuek (Arkitektoen Elkargoarenak kasu) galeriak kontserbatzearen beharra eta bideragarritasuna defendatzen baitituzte. Areago, horretarako propio egindako bileran, Udalaren ordezkariek onartu dute aldaketak ez direla ezinbestekoak proiektuak aurrera egiteko, hobekuntza soilak liratekeela", azaldu dute abertzale eta ezkertiarrek. Gauzak horrela, ez dute uste "enpresa pribatu baten proiektu ekonomiko baten hobekuntzaren interesa getxoztarrek beren ondasunak eta ondare kultural zein historikoa zaintzeko duten interesaren gainetik jar daitekeenik". Ehunka herritarrek ere hala iristen diote, aurkeztu dituzten galdapenetan.
Bigarrenik, egin nahi diren aldaketak Espainiako Kosta Legeak babestutako eremuan gertatzen direlarik, "horrelako aldaketak ezin izango lirateke egin; edota bestelako tramite batzuk egin beharko lirateke aurretik", aipatu dutenez.
Prozedura biziatua
Hirugarren eta azkenik, proposamen horren atzean dagoen prozedurak "biziatua dirudi", euren ustez. "Galdetu beharra dago, besteak beste, zergatik onartu zituen Barcelok hasierako baldintzak, eta orain aldaketa horiek gabe proiektua bideraezina dela esaten den. Eta etorkizunean ere zalantzak sortuko ditu; adibidez, nola onar daitekeen lehiaketa publikora atera ziren baldintza teknikoen aldaketa, lehiaketa berria deitu gabe", gaineratu dute.
Horregatik guztiagatik, eta bereziki "espekulazioaren eta negozio handien mesedetan Getxon gertatzen ari den herri ondasunen zein ondare natural, historiko eta kulturalaren galera geldiarazteko", HAPOren aldaketa hauek ez onartzea eskatzen dute.
Begoña gazteluko aldaketa proiektuari galdapenak aurkeztu dizkio Getxoko ezker abertzaleak
Ezker abertzaleak gaur goizean aurkeztu ditu, udal erregistroan, Algortako Begoña gazteluko galerietan hotela egin ahal izateko, Getxoko Udalak Hirigintza Antolaketarako Plangintza Orokorrean (HAPO) egin nahi dituen aldaketen aurkako galdapenak. "Jakina denez, aldaketa hauen bitartez Udalak men egingo lieke Begoña gaztelua edo Etxebarrietaren txaleta izenez ezagunak diren galerietan hotel bat egin asmo duen Barcelo enpresaren eskakizunei", azaldu dutenez. Aipatu aldaketek, laburki, zera suposatuko lukete euren hitzetan: "batetik, getxotarren jabetzakoak diren galeria hauetan hotela eraikitzeko lehiaketara ateratakoa baino 3.500 metro koadro gehiago ematea Barcelori, besteak beste alboko Vicente Amezaga plazaren eta Arriluzeko biribilgunearen azpian eraikitzea baimenduz; bestetik galeriak partzialki zein osoki eraisteko ahalmena ematea, berriro eraikitzeko, egun ondarearen babeserako araudiek ezartzen dutenaren aurka". Argazkian, udal arduradunak galerietara bisita egiten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun