Leioako L.A.D.R. 45 urteko gizonezkoa erreskatatu du Ertzaintzako mendirako erreskate taldeak Dimako Indusi auzoan. 13:30ak aldera, mendizalea Baltzolako kobetarako sarrera egiten duen Jentilzubitik behera erori da, 15 metroko jauskeran. Hainbat pertsonak deituta Jentilzubiraino hurbildu da Ertzaintzako Brigada Higikorreko Mendirako Erreskate Taldea, "arratsaldeko lehenengo orduan" Herrizaingo Sailak zabaldu duenez. Ertzainak zauritutako mendizale leioztarrarengana jaitsi eta 500 metro gora eraman behar izan dute, anbulantzia hurbildu ahal izan den lekuraino. Herrizaingo Sailak jakinarazi du L.A.D.R. ospitaleren batera eraman dutela, baina ez du zehaztu zein osasun zentrora. Era berean, zaurituaren osasun baldintzen inguruan, pronostiko erreserbatua duela baino ez du zabaldu. Argazkian, Jentilzubiren artxiboko irudi bat / BocaDorada.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun