Lehenengo hiru ordutan elkartutako 246 lagunei beste 497 herritar batu zaizkio, 15:00etatik 21:00etara, Algortako Telletxe plazan, Anjel Figueroa preso gaixoari Espainiako Kode Penaleko 92. artikulua aplikatu eta, horrenbestez, kalera atera dezatela eskatzeko. Deialdia egindako Anjel Kalera! herri ekimeneko (26 pertsona), sindikatuetako (47), preso egondako eta gazte erakundeetako (49), hainbat lagun-talde algortarretako (50) eta Figueroaren beraren koadrilako kideak (100) kontzentratu dira txandaka. Azkenik, 20:00etako deialdi orokorrean, 225 herritar inguratu dira Telletxera. Tartean, LABeko, Bilgune Feministako, Ikasle Abertzaleetako, Segiko, Txorimalo eta Itzubaltzeta gaztetxeetako, Amarratsak eta Plaza Beltza kolektiboetako, Sopelako Gazte Asanbladako eta beste hainbat erakundeetako lagunak izan dira bertan. Besteak beste, Manu Idarraga, Lurdes Cerrato, Marian Perez del Rio, Mitxel Sarasketa, Jagoba Terrones eta Angel Alcalde preso ohiek ere adierazi diote elkartasuna Figueroari.
Txalaparta doinuan eta Gabi Basañezek botatako bertsoaren ostean, Mari Karmen Fernandez preso gaixo algortarraren amaren eta Laura Mintegi idazle eta Anjel kalera! herri ekimeneko bozeramailearen hitzek eman diote bukaera bederatzi ordutako ekitaldiari. Lehenengoak 12:00etatik 21:00etara batutako guztiei eman die eskerrak, hunkituta. Bigarrenak, berriz, gaur bezalako ekimenak "oso garrantzitsuak" direla nabarmendu du. "Honen bidez, ez dugu Anjelen askatasuna bakarrik aldarrikatu nahi; bera bezain gaixo dauden beste hainbat preso daude. Horiek ere kalera ditzatela eskatzen dugu", gaineratu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun