Hainbat bider mehatxua bota ostean pasa den asteazkenean Marisa Arrue Getxoko PP ren presidenteak eta Luis Almansa Getxoko PSE-EEren bozeramaileak Imanol Landa udalerriko alkatea salatu zuten Bilboko Administrazioarekiko auzi-epaitegian. Auziaren muinean dago 2007ko azaroaren 8an Udalbatzak onartu zuen Udal Arautegi Organikoa indarrean jartzeari Landak emandako ezetza. Arruek horrela defendatu zuen Landaren aurka jarritako Administrazioarekiko auzi-errekutsoa: "Udalbatzaren akordioak betetzeari uko egiten dion alkate intsumiso eta matxinoaren aurrean, justiziaren babesa bilatzera behartuak ikusi ditugu gure buruak". Almansak, berriz, gogoratu zituen onartutako arauaren balizko ontasunak: "auzokideei udaletxearen ateak irekitzea, hiritarren parte hartzea eta Gobernuak egiten duen kudeaketaren gardentasuna, kontrol eta fiskalizazio handiagoa bultzatuz". Alkateak behin eta berriro aldarrikatu du iaz onartutako udal arautegi berriak hainbat irregulartasun eta artikulu ilegalak dituela eta, beraz, ezin dela indarrean jarri.
Almansarentzat, ordea, Landaren jarrerak "politika ilun, bezeriaren aldekoa eta autoritarioarekin jarraitzea" baino ez du helburu. Haratago joan zen Marisa Arrue popularra, Getxoko alkateak "udalerria gelditu nahi du aurrerantz joan ez dadin" esan zuenean. Epaitegiek arrazoia emango dietenetz sei edo zazpi hilabete barru jakingo dutela aurreratu dute Espainiako bi alderdi nagusiek Getxon dituzten ordezkariek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun