Izan ere, Urtzi Murueta seinalatzen duen lekukotasun bakarra baino ez dago, Orkatz Gallastegik Ertzaintzaren aurrean sinatutakoa. Gallastegik inoiz ez du deklarazio hura berretsi eta epailearen aurretik eraman duten bakoitzean torturak salatu eta guztia ukatu baitu. Guztira, 14 lekuko eta 10 peritu izan dira epaitegian eta Muruetaren aurka "erabili nahi duten 'froga', elementu edo kasu honekin duen lotura bakarra" Ertzain-etxean Gallastegik sinatutakoa dela salatu du AAMk.
Muruetak berak ere leporatzen dioten guztia ukatu egin du epaiketan. Auzi honetan kondenatuta dagoen Orkatz Gallastegik ere deklaratu zuen epaiketa honetan eta berriro esan zuen ez duela inoiz epailearen gaineko informaziorik jaso eta ez ziola Urtziri horren gaineko inolako daturik eman. Gallastegiren arabera, Ertzaintzak komisarian deklarazio bat sinarazi egin zion, "torturak eta mehatxuak erabiliz, besterik gabe".
AAMren aburuz, "horrela inor ezin dela kondenatu pentsa daiteke, baina hau beste kontua da: batetik, Espainiako Auzitegi Nazionalak euskal herritarren aurka daraman estrategiaren barruan sartzen da epaiketa hau ere, eta bestetik, 30 urteko espetxe zigorraz gain, fiskalak milioi bat euroko kalte-ordaina eskatzen du, eta kasu honetan, Lidonen familia dirutza hori kobratu gabe geldituko da Urtzi absolbituz gero". Izan ere, errepresioaren aurkako mugimenduaren arabera, "Urtzik dirutza hori ordaindu ezin badu, Estatuak bere gain hartu beharko luke kalte-ordaina, azken urteotan terrorismoaren biktima talde horiek Gobernuarekin egindako akordioaren arabera. Modu horretan, eta horregatik kondenatu zuten Orkatz ere azken finean, epaileen arteko korporatibismoa tartean, nahiz eta dirutza horiek kobratzeko gazte hauek bizitza osorako espetxean sartu behar", salatu dute.
AAMk aipatu duenez, "epaiketan epaileak errieta egin behar izan zion ertzain bati deklaratzerakoan berari ez zegokion zenbakia eman zuelako, bere nortasuna mozorrotzeko".
Pasa den ostegunean eta ostiralean, otsailaren 28 eta 29an, Espainiako Auzitegi Nazionalean egindako epaiketan, fiskalak 30 urteko espetxe zigorra eskatu zuen Urtzi Murueta leioaztarrarentzat, AAMk Etengabe bitakoraren bidez jakinarazi duenez. 2001eko azaroaren 7an ETAk Algortako bere etxe aurrean hil zuen Jose Maria Lidon epailearen hilketan ezinbesteko kolaborazioa izan zuela egotzi dio akusazioak Muruetari. Hain zuzen ere, Blanca Rodriguez fiskalak esan zuen leioaztarrak Orkatz Gallastegiri Lidon epailearen jarraipena egitea agindu ziola eta datuak jaso ondoren ekintza burutu zuten ETAko kideei pasatu zizkiela. 30 urteko espetxe zigorraz gain Lidonen senideei milioi bat euroko kalte-ordaina eta epailearen autoak jaso zituen 5.963 euroko kalteak ere ordaintzea eskatu du Muruetarentzat Rodriguezek. Gazte leioaztarren defentsak, berriz, Ertzaintzak auzian dagoen froga bakarra torturaren bidez lortu zuela salatu zuen. Argazkian, Urtzi Murueta Auzitegi nazionalean / Etengabe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun