Diezen alderdiak zabaldu duenez, "une hauetan, hauteskunde premiei baino Bizkaiko UPDk lehentasuna ematen dio giza atsekaberi, maite den hurkoaren galerak sortutako doluari. Helburuekiko alderdiaren konpromisoa handia bada handia da ere bere militanteen giza konpromiso sentimentala, Pilarren heriotzak eragin duen dolu eta atsekabeak hunkituta".
UPD Algortan
Halere, atzo arratsaldean UPDk mantendu egin zuen Algortan zeukan hauteskunde ekitaldia, nahiz eta Fernando Maura ez joan. Kati Gutierrezek ere ez zuen "Zergatik UPD?" izeneko diskurtsoa bota, eta beste bi erkiderekin batera propaganda ematera mugatu zen. Isiltasunez, metro geltokiaren sarreran, euritik atertuta, "Batzen gaituena" leloko egunkariak eta esku-orriak banatu zituzten, euskarari barik UPDren balizko diputatu bakarra izan daitekeen Rosa Diezen Espainiako nortasun agiriari erreferentzia egiten dutenak. Metro batzuetara, beste bi erkide sendoak edo bizkartzainak zaintzen zuten ingurua eta errepidearen bestaldean, berriz, Ertzaintzaren furgoneta. Telletxe plazako punta batean kanpaina-autoaren megafonoek Bob Dylanen "Blowin' in the Wind" abesten zioten melankoliaz, beste puntan zegoen "M9: boikota" panelari. Hauteskunde paneletan, berriz, UPDkoek bi kartel baino ez zituzten jarri, biak abstentziora deitzen zuten kartelen gainean.
Behin-behinean, Union Progreso y Democracia (Batasuna Aurrerapena eta Demokrazia) alderdiak bertan behera utzi ditu bere hauteskunde ekitaldiak, Espainiako Kongresurako Bizkaiko zerrendaburua den Fernando Mauraren alaba igandean hil ostean. Pilar izeneko gazteak jaio zenetik gaixotasun larria izan du eta Gurutzetan hil zen herenegun, 20 urte zituela. Maurak lehenengo eta alderdiak beranduago, biek kanpaina utzi dute. Rosa Diez alderdi zentralistaren arduradunak jakinarazi duenez, "albistea jakin bezain laster alderdiak bere hauteskunde ekitaldi gertuenak bertan behera utzi eta bere bozeramaile, erkide eta lagunaren doluarekin bat egin du". Era berean, UPDtik "besarkada sendoa" eman diote Fernando Maurari eta "maitasuna" agertu diote. Bestalde, Pilarren hileta gaur egingo da Areetako Mesedeetako Amaren elizan, arratsaldeko 7etan. Argazkian, Fernando Maura / UPD.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun