Sopelako Udalbatzak herrian Batxilergoa eta Derrigorrezko Bigarren Hezkuntza (DBH) ikasketak eman ahal izateko zentroa jartzeko eskatu dio Eusko Jaurlaritzako Hezkuntza Sailari, 12 eta 18 urte arteko gazteei zuzendua. Sopelako Bigarren Hezkuntza Institutuaren bitartez bideratu da eskaria, eta onesten bada "herriak hezkuntza publikoko programa osoa edukiko luke, hezkuntza mapa berriaren baitan", udal iturriek nabarmendu dutenez. 1996ko urtarrilaren 30eko dekretuaren bidez onartu zen egun indarrean dagoen hezkuntza mapa, Euskal Autonomia Erkidegoan (EAE) unibertsitatez kanpoko hezkuntza zentroen mapa egonkortzen zuelarik. Horrela, tokiko arduradunen esanetan, "12 urte joan dira eta aldaketa asko gertatu dira, ez bakarrik hezkuntza sisteman, baita Sopelan bertan ere". Argazkian, Imanol Garai alkate jelkidea.
Azaldu dutenez, 2010ean Sopelan 1.500 etxebizitza berri egitea aurreikusten da, eta horrek herritarren kopurua nabarmen handituko du, baita eskolaratzeko adinean dauden familia gazteena ere. Gainera, Imanol Garai alkateak azpimarratu duenez, herrian jaiotze-maila handia dago, Uribe Kostako udalen aldean %50 handiagoa. Horrez gain, "Sopelako BHIak dauka erkidegotik kanpotik datozen ikasleen kopuru handiena, %15 gutxi gora behera". Horregatik, Sopelako Udalak eta Ikastetxeko Batzordeak ezinbestekotzat jo dute "Batxilergoa eskaintzen duen ikastetxe bat, neska mutilek herritik joan beharrik izan ez dezaten; 0 eta 18 urte arteko adin osoa baitan hartuko lukeen erabateko programa ahalbidetuko lukeelako". Eskaria onartzearekin batera, Sopelan ikastetxe berria eraiki beharko litzateke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun