Nuestra Señora de Europa Getxoko ikastetxea salgai jarri du Charo Abad jabeak. Egun, zentroak Haur eta Lehen Hezkuntzan euskaraz, eta ingeleraz apaindutako A eredua eta DBHn ingelerazko murgiltze eredua eskaintzen dizkie 700 bat ikasleei. Erabakiaren berri eman zien orain dela hamar egun irakasleei eta ikasleen gurasoei eta gaur Abadek "El Correo Español" egunkariaren orrialdeetan aitortu duenez, bere 64 urterekin eta gaixorik egonda, ikastetxea utzi eta saltzea erabaki du. Horretarako, Estatu mailako zein nazioarteko hezkuntza arloko taldeei ikastetxeak saldu dizkien Madrilgo enpresa batekin harremanetan jarri da, guraso eta irakasleen balizko kooperatiba baztertu ondoren. Ikastetxea eraikitzen den lurren balio handia kontuan hartuta, Abadek ezeztatu ditu salmentaren atzean eraikuntza-operazioren bat egon daitekeela dioten zurrumurruak.
Ekainerako espero duen salmenta gauzatzeko ikastetxearen "heziketa proiektua", langileria eta ikasleria mantentzea ezinbestekoa izango dela adierazi du: "niretzat [ikastetxea] seme-alaba bat bezalakoa da eta ez dut edonoren esku utziko". Eskola orain dela 40 bat urte zabaldu zuen Algortan Abaden senarra zenak. Urte batzuk beranduago, ordea, Goñi estartara lekuz aldatu zen, orain dagoen tokira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun