Margoak dira bere koadroen osagarri nagusia. “Ez ditut nahita aukeratzen, nahi gabe baizik, eta ondorioa margolan koloretsua izaten da”, Toyosek onartu duenez. “Agian, artearen bidez mezu baikorrak zabaltzea atsegin dudalako izango da, eta hori lortzeko osagarri garrantzitsua da kolorea”.
Pinturarekin buru lepo 15 urte daramatza Toyosek. Txikitatik erakarri zuen pinturak. “Adierazteko modu bat izan da beti, norbanakoena, agian egoista ere bai, margotzen dudanean neure buruan besterik ez baitut pentsatzen”.
Artistak urteak daramatza ere diseinu grafikoan lanean: “erakusketa hau aro berri baten hasiera da nire artearentzat, iraganari gainbegiratua egiten ari natzaio eta, etorkizunari aurre egin aurretik, eta pintore profesional izateko lehen urratsa da bide batez”, azpimarratu du Ainhoa Toyosek.
Gaur egun bi egitasmo ezberdin ditu eskuartean, “erabat ezberdinak orain arte eginikoarekiko”, eta urte amaieran erakusgai jartzea espero du.
Erakusketa ikusteko ordutegia honakoa da: astegunetan, 16:00etatik 21:00etara; larunbatetan, 11:00etatik 15:00etara eta 16.00etatik 19.00etara; eta igandeetan, 11:00etatik 15:00etara.
Ainhoa Toyosen erakusketa abiatu da Sopelako udaletxean
2008ko mar. 4a, 19:36
Sopelako udaletxeko sotoan dagoen udal erakusgelak Ainhoa Toyosen "1996-2008 atzera begirada" izeneko margo erakusketa abiatu zuen atzo, hilaren 16rarte ikusgai egongo dena. Leioan Arte Ederretan lizentziatu zen eta margo eta diseinu grafikoan espezialista den Ainhoa Toyos gazte ermuarraren ibilbide artistikoaren berri ematen duten 21 artelan ikusi ahal izango dira. Izan ere, erakusketaren izenburuak azaltzen duenez, margoetan ibili den garapenaren berri eman nahi du erakusketarekin Toyosek: “margolan hauek aukeratu ditut, eta ez beste batzuek, azken urteotan egin dudan lanaren erakusgarri direlako”, adierazi du gazteak. Era berean, estilo zehatzik izatea ukatu du artistak: “pintura atsegin dut, bere adierazpen guztietan”. Gainera artea lantzeko irizpideetako bat esperimentazioa dela dio, “beti berdin margotzearekin aspertuko nintzateke, gauza berak margotzearekin”. Horregatik bere artelanak oso ezberdinak dira elkarren artean, bai teknikari dagokionez, bai formatu eta materialeei dagokienean ere. Irudian, egilearen autorretratua / © Ainhoa Toyos.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun