Madrilen "Euskadi salerosten" aritzea egotzi dio EAJri EAk
2008ko mar. 4a, 19:57
Kosten Legea aitzaki hartuta, hitzaldia eskaini zuen atzo, Sopelako kultur etxean, Martin Aranburu Espainiako Kongresurako EAko Bizkaiko zerrendaburuak. Ezker-eskuinean, martxoan 9ko hauteskundeetarako lurraldeko zerrendan bigarren Leire Pinedo tokiko zinegotzia eta Eusko Jaurlaritzako Biodibertsitate zuzendari Elisa Sainz de Murieta izan zituen lagun euskal sozialdemokraten hautagaiak, 25 entzuleren aurrean. Hain zuzen ere, lurralde antolaketa eta babesaren inguruko auziak "Espainiako Gobernuak EAEko Autonomia Estatutua ez betetzearen ondorio" direla adierazi zuen Aranburuk. Hori horrela, garain garaiko gobernu zentralarekin "salerosketa jokoan" aritzea egotzi zion EAJri EAko hautagaiak. "Dagoeneko 30 urte daramatzagu dagozkigun eskuduntzak eskatzen. Hain zuzen ere hori da Madrildik zer edo zer lortzen dutenean EAJk aipatzen ez duena; eurek lortu dutela bai, baina ez dute 30 urte eta gero gureak behar luketen eskuduntzak direla aitortzen", adierazi zuen Aranburuk. Argazkian, ezkerretik eskuinera, Pinedo, Aranburu eta Sainz de Murieta, atzoko ekitaldian.Espainiako Kongresurako EAko Bizkaiko zerrendaburuak "joko horretan sartzeko prest ez" daudela gaineratu zuen. "Egin ez eta egiten uzten ez diguten Euskadi horrek 300 milioi euroko diru galera ekartzen digu urtero", Aranburuk salatu zuenez. Adibideetara joz, besteak beste, Ingurumen arloan, Petronor enpresako Muskizko lantegia kendu ala ez egun "Madrilen erabakia" dela nabarmendu zuen sozialdemokraten ordezkariak. "Ez dugu esango kutsatzen duen lantegi bat kentzea ondo ez dagoenik. Kontua da desegin eta gero bertan zer egin erabaki ahal izatea gustatuko litzaigukela", azaldu zuen. Aranburuk gaineratu zuenez, "denbora eta dirua inbertitu dugunean argi utzi diegu hori eta gehiago egiteko kapaz garela".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun