Bestalde, Obietako tarte horretan zegoen autobus geltokia Desanexio kalera lekuz aldatu dute, Bekoa herri ikastetxea eta osasun etxetik gertu. Era berean, aldaketak sor ditzakeen oztopoak murrizteko beste bi geraleku jarri dituzte Tartaga kaleko 5. atariaren parean.
Obietan egingo diren hobekuntzen artean espaloiak egungo zabaleratik 3,10 metrora handitzea; farola, zakarrontzi, gai apaingarriak eta loreontzi berriak jartzea; eta errailak 6 metrora zabalduz, ibilgailuen norabidea bikoiztea daude. Izan ere, Obietako 150 metro horietan dauden autoa uzteko tokiak kenduko dituzte. Gainera, inguruan guztiz berriztatuko dituzte ur, argi, elektrizitate eta telefonia sare guztiak.
Lanetan 720.000 euroko inbertsioa egingo du Udalak Obietan eta lanak sei hilabetetan amaitzea "espero" du Asier San Nicolas Hirigintza alkateordeak. Izan ere, Jose Luis Goyoagan egiten ari diren lanetan ur-tutu batekin izandako makina bat arazoren ostean hango obrak "Aste Santua baino lehen egongo diren ez dakit" onartu du San Nicolasek, "baina, bukatuta ez badago, gutxienez trafikorako irekita egongo da", azpimarratu du.
Aparkalekuak
Obietan egingo diren lanekin aparkaleku gutxiago izango da herrian baina, San Nicolasek onartu duenez, oraindik lurrazpiko aparkalekuen proiektua zelan egingo den ez dago argi. Oraingoz, inkestak egiten ari zaizkie auzokideei zer nolako eskaera dagoen jakiteko, zer motako alokairua edo jabetza nahiago den, kotxedunak zenbat ordaintzeko prest dauden eta horrelako baldintzak ezagutu eta handik aurrera proiektua idazteko.
Erandioko Obieta kaleko hirugarren zatian telefonoa, argindarra eta uraren sareak berritu eta lur azpian jarri, errepidea norabide bikoitzerako moldatu eta espaloiak luzatzeko, gaurtik aurrera eta gutxienez sei hilabetez egongo da trafikoari itxita Txinboak eta Txorierri eta Desanexioa bitarteko tartea. Gainera, kale zati horren itxierak Altzaga auzo osan eragingo du. Batez ere, autobus geltokiak lekuz aldatzea behartuko duelako eta ibilgailu astunen eta autobusen ibilbidea aldatuko duelako. Era berean, Desanexioa eta Arriagarako bidearen artean ibilgailuak txandaka igaroko dira, propio horretarako jarriko den semaforoak agintzen duenari kasu eginez. Asier San Nicolas Hirigintza alkateordeak atzo jakinarazi zuenez, trafiko astuna San Inazio, Tartanga, Desanexioa eta Altzaga-Goikoa kaleetatik sartu beharko da. Ateratzeko, berriz, Altzaga-Goikoa, Desanexioa, Tartanga eta Urdaneta kaleetatik egin beharko du. Argazkian, Obieta kalea atzo.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun