Telefonia antenei buruzko mintegia antolatu du ostegunerako Getxoko Udalak

Erabiltzailearen aurpegia Ukberri 2008ko mar. 4a, 23:14
Eremu elektromagnetikoekiko esposizioak osasunaren gainean izan ditzakeen ondorioengatik telefonia antenek hainbat herritarren artean alarma piztu dutela jakinik, Getxoko Udalak Espainiako Udalerri eta Probintzien Federazioko (FEMP) Laguntza Teknikoko eta Informazio Zerbitzuaren adituekin batera “Sakelako telefoniako antenak: alderdi teknikoak eta biomedikoak” izeneko mintegia prestatu du, beste herri batzuetan egindakoen antzekoa. Saioa ostegun honetan, hilak 6, burutuko da Andres Isasi Musika Eskolan, 18:30ean. Getxoko Udal Gobernuaren arabera, Udalak “informazio eskaerei erantzuten ari da eta gainera, lantalde bat sortu du zerikusia duten eragile guztien interesak eta kezkak ordezkatzeko”. Era berean, antenen funtzionamenduaren eskuduntza Espainiako Gobernuarena dela gogoratu dute. Hala ere, gaiaren kezka ez dela desagertu egiaztatu du Udalak “eta horregatik informazio saioa antolatu du iturri espezializaturen eta fidagarriren partaidetzarekin”. Bi ordu t'erdiko saiora auzokide guztiak gonbidatu ditu. Argazkian, antenen aurkako kartelak Paulino Mendibil kaleko etxebizitzetako leihoetan / Antena Ez.
Egitaraua:

- 18:30, Saioaren hasiera. Hizlariak: Imanol Landa Getxoko alkatea eta Joseba Arregi Hirigintzako zinegotzia.

- 19:00etan, “Sakelako telefoniaren dimentsio teknikoa: zer dira sare bat eta antena bat, nola funtzionatzen dute eta zertarako balio dute”. Hizlaria: Adrian Nogales Telekomunikazioetako Ingeniarien Elkargo Ofizialaren idazkari orokorra eta FEMPeko telekomunikazioetako arloko arduraduna.

- 19:30ean, “Irratikomunikazioko azpiegituren osasun garantiak”. Hizlaria: Francisco Vargas Osasun Nazionaleko Medikuen Kidegoko epidemiologoa, FEMPeko arlo biomedikoaren arduraduna eta Madrilgo Complutense Unibertsitateko Irrati-frekuentziei buruzko Aholku Batzorde Zientifikoko kidea.

- 20:00etan, Mahai-ingurua eta solasaldia: “Sakelako telefoniako azpiegituren gaineko kontrol tekniko eta sanitarioaren gizarte eskariari erantzutea”. Gonbidatutako pertsona eta elkarteak: Alfonso Sanchez Industria, Merkataritza eta Turismoko Ministerioaren Telekomunikazioetako Ikuskapeneko Probintziaburua; Adrian Nogales (FEMP); Francisco Vargas (FEMP), Antena Ez elkartea; eta Getxoko Gurasoen Elkartea. (Oraindik ez dute beren parte hartzea egiaztatu).
Jendartea Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun