Plentziako Udaleko Gazteria Arloak ostegun honetan, martxoak 6, izango den batzarrera deitu ditu 14 eta 30 urte bitarteko neska-mutilak, Gazte Plana lantzeko asmoz. Tokiko arduradunek adierazi dutenez, "gazteriarentzat berebizikoak diren gaietan zuzenean zein zeharka eragitea" du helburu garatu nahi duten plangintza berriak. "Horrenbestez, bi ildo jarraituko ditugu: batetik, zer egiten ari garen ondo edo zertan hobe dezakegun eta, bestetik, ahal den neurrian, gazteen bizi kalitatea hobetzeko guztion artean zer egin dezakegun", azaldu dute udal arduradunek. Hori dela eta, "guztiz beharrezkoa" jotzen dute neska-mutil plentziarren parte hartzea: "ezin dugu zugatik erabaki", diotenez. Biharko bilera, beraz, 18:30ean izango da, Goñi Portal kultur etxean. Argazkian, Plentziako udaletxea eta Astillero plaza / Edonola.net.
Hala ere, Gazte Planaren lanketan parte hartzeko beste hainbat modu edukiko dituzte 14 eta 30 urte bitarteko plentziarrek. Besteak beste, e-posta helbidea (gazteplana.plentzia@bizkaia.org), telefono zenbakia (946 775 541) eta, hilaren 16ra bitartean, postontziak (portuan, Astilleron, Gatzamiñen, Isuskitzan, Saratxagako sagardotegian eta Eleiz plazan) jarri dituzte, gazteek eurek iritziak, kezkak eta ideak helarazteko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun