Barcelona Sinfonietta Orkestra CICeko Institució Culturalaren baitan sortu zen eta anglosaxoien munduan oso hedatua dagoen orkestra profesionalen eredu bati jarraitzen dio, bai kudeaketagatik eta antolamenduagatik bai osatzen duten musikaren kalitateagatik ere. 1998an aurkeztu zen Orkestra, Barcelona Sinfonietta izenarekin. Geroztik, musika-jarduera handia eta nabarmena izan du, eta horregatik bihurtu da Bartzelonarako erreferentzia garrantzitsua.
Ohiki aritzen da Barcelonako L’Auditori aretoan eta Palau de la Música Catalanan, eta arrakastaz parte hartu izan du, beste batzuen artean, El Vendrell, Canet, Calonge, Ciutadella, Vilabertran eta Cadaquésko musika-jaialdietan. 2006an, itzuli bat egin zuen Txinan barrena, kontzertuak emanez Shangain eta Pekinen. Getxon eskainiko duen kontzertuak bi zati izango ditu: lehenengoan, instrumentala, Vivaldi izango da protagonista nagusia; bigarrenean, abeslari gonbidatuek parte hartuko dute eta Pergolesiren “Stabat mater” obraren zatiak interpretatuko dituzte.
Francesc Llongueres zuzendaria
Orkestraren sortzaile eta zuzendaria Francesc Llongueres da. Sergiu Celibidache maisuaren laguntzaile izan zen, eta haren ikaslerik onenetakoa. Europan zehar orkestra ugari zuzentzera gonbidatu dute, baita gure herrialdeko talde sinfoniko nagusienak ere. Besteak beste, nabarmentzekoak dira, Orquestra Ciutat de Barcelona, Gaztela eta Leongoa, Asturiaskoa, Valentziakoa eta Radio Televisión Españolekoa. Pedagogo bezala dituen kualitateak bultzatuta, gazteei zuzendutako orkestra-trebakuntzarako planak diseinatzera eta zuzendaritza-ikastaroak ematera eskaini izan du bere jardueraren zati bat. Maiz aritzen da zuzendari gonbidatu gisa hainbat talde profesionaletan, eta BCN Sinfonietta Oskestrako zuzendari titularra da. Virtelia Escola de Musicaren zuzendaritza lanekin batera egiten ditu jarduera horiek. 2003 eta 2007 artean Cadaquésko Musika Jaialdiaren zuzendari izan zen.
Musika klasikoaren jarraitzaileek gaur eta bihar izango dituzte azken aukerak Algortan burutzen ari diren Getxoko Udaberriko Kontzertuen 23. edizioaz gozatzeko. Gaur, Jeremy Menuhimek (pianoa), Pablo de Naveranek (biolontxeloa) eta Philippe Graffik (biolina) osatutako hirukotea arituko dira Getxo Antzokian, ohi bezala 20:00etatik aurrera. Orain dela zenbait urte hasi zen elkarlanean hirukotea eta, handik hona, hainbat herritan jardun da. Datorren asteko saioan, Schuberten eta Ravelen piezez osatutako programa interpretatuko dute. Bihar berriz, leku eta ordu berean, Barcelona Sinfonietta emango dio amaiera zikloari. Talde horrek 20 bat musikari biltzen ditu eta, biharko saioan honako gonbidatu hauek izango ditu: Olga Miracle sorpanoa, Marisa Roca mezzosopranoa, Stanislav Stepanek biolin-jolea eta Eva del Campo klabezin-jolea. Argazkian, Bartzelonako orkestraren kide batzuk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun