Gorrondatxe hondartzako apo lasterkaria babesteko neurriak hartzen ari da Getxoko Udala
Getxoko Udaleko Ingurumen Saila "udalerri mailan aitzindariak" diren neurriak hartzen dabil, galbidean dagoen apo lasterkaria babesteko asmoz. Euskal kostaldean, Getxoko Gorrondatxe hondartzan eta Pasaiako Txingudi badian (Gipuzkoa) bakarrik aurki daitekeen animalia babestea Bizkaiko Foru Aldundiaren ardura bada ere, "espezie horren etorkizunaz kezkatuta, orain bi urte hasi ginen apo lasterkariaren egoera aztertzen, baita horren ugalketa ahalbidetzeko ekintza batzuk abiatzen ere”, azaldu du gaurko prentsaurrekoan Keltse Eiguren Ingurumen zinegotziak. Apo lasterkari gutxi dago Kantauriko kostaldean. Begi nini horizontala, marra horia gorputzean eta itxura zimurtsua ditu. Inguru hareatsuan bizi ohi da, gauez ateratzen da bakarrik eta, egunean zehar, harrien azpian izkutatzen da. Ugalketarako, berriz, urmaelak behar ditu. Argazkian, Keltse Eiguren Ingurumen zinegotzia, Josu Ateka udal teknikaria alboan eta, atzean, apo lasterkariaren irudia duela.
Inguruan apo lasterkariarentzat arriskutsua izan daitekeen harraparirik eta anfibio espezie horretako poblazio berririk ez dagoela egiaztatu ondoren, bere ugalketarako eta babeserako baldintzak aztertu zituzten. Aurten hainbat jarduera eramaten ari dira aurrera, batez ere “Prestige ontziaren hondamendiaren aurretiko egoera berreskuratzeko eta hondartzako erabiltzaileek mugitu dituzten harriak berriro era egokian ipintzeko, aldaketa horiek apoak babes tokirik gabe uzten baitituzte udan”, Xabier Buenetxea baso-ingenieri tekniko eta ingurumen gaietarako udal aholkulariak azaldu duenez. Ekintza horien artean, hainbat gune berreskuratu dituzte, bereziki bi hezegune natural. Horretaz gain, iturburu batek urez hornitzan duen hondartza alboko eta beheko aldea hesiz itxi dute datorren maiatzaren amaierara bitartean, espeziearen ugalketa zaintzeko. Azkenik, bi urmael artifizial egokitu dituzte. Hesiz itxitako aldean informazio panel batzuk jarri dituzte Udala egiten ari dena azaltzeko. Ingurumen Arloaren asmoa ere bada hondartzako erabiltzaileen artean gai horrekiko heziketa kanpaina abiatzea, apo lasterkaria babesteko aholku batzuk emanez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun