Aterpek jorratzen dituen gaien artean daude etxebizitza, formakuntza edota lanbide kontuak, aisialdirako aukerak osatzeaz gain. Azken arlo horretan gehiago eragiteko asmoz, Aterpek hainbat ekintza antolatzen ditu herriko gazteentzat, hauen artean, Pop-Rock lehiaketa famatua, gazte margolarien lehiaketa, Euskal Herrian zehar izaten diren euskal jaietara joateko bidaiak, eski bidaiak, orientazio hitzaldiak, ikastaro desberdinak –argazkilaritza digitala, txalaparta, alboka, gomaespuma, zirku teknikak, lehen sorospenak, perkutsioa, txotxongiloak, ipuin kontalariak, barreterapia edota bolondres ekintzetarakoak–.
Aterpek zerbitzua eman dien erabiltzaile gehienak Kultur Leioako bulegoan egin dituzte gestioak, baina nabaria izan da posta elektronikoaren bitartez bidalitako galderen igoera.
2007an izandako nobedaderik garrantzitsuenak Leihosex sexuari buruzko aholkuaritza zerbitzu berria eta Gabonetako Gaztegunea izan dira, Aterpeko teknikarien aburuz. Gabonetan hainbat ekintza burutu ziren, horien artean wii txapelketa edota stop motion tailerrak. Oso harrera ona izan duten ekimenak izan dira azken horiek.
Aterpe Leioako Udalaren Gazte Informazio Zerbitzuak 3.000 kontsulta baino gehiago jaso zituen joan den urtean. Informazio eskaera hauek lan orientazio, formakuntza, bekak, bidaiak, jaiak, lehiaketa zein beste ekintza batzuei buruzkoak izan ziren gehienbat, udal iturriek zabaldu dutenez. Iturri berberen arabera, Aterpe "udalerriko gazte gehienentzat" erreferentea bilakatu da "kezkatzen dien edozein informazio eskuratu nahi dutenean". Batez ere, udal diru laguntzak eta atzerrian ikasteko aukerei buruzko informazioa eskatu zuten iaz Leioako gazteek. Leioako biztanleen batez besteko adin gazteagatik eta heren batek 30 urte baino gutxiago zuela eta sortu zen udalerrian gazte zerbitzu hori. Udal Gobernuaren ustez, "Leioako I Gazte Planaren bidez, gero eta gazte gehiago dira Aterpeko zerbitzuak eskatzera hurreratzen direnak" edozein informazioa eskuratzeko asmoz, baita antolatutako ekintzetan parte hartzeko zein bestelako galderak egiteko. Argazkian, gazte batzuk Kultur Leioan / Aterpe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun