Euskal Herriko Unibertsitatearen adierazpena
Isaías Carrasco Miguel jauna gaur erail duen hilketaren aurrean, Euskal Herriko Unibertsitateak ondokoa adierazi nahi du:
1. Lehenengo eta behin, gure dolumina eta atsekabea helarazi nahi dizkiegu hildakoaren senitartekoei, eta agerian eskaini nahi dizkiegu gure sostengua eta elkartasuna.
2. Bigarren, irmotasun osoz gaitzesten dugu atentatu hau, eta gure arbuioa agertu nahi dugu, unibertsitario garen aldetik, eta andre eta gizon zintzo izan nahi dugun aldetik. Adierazbide politikoa eta gizartearen elkar bizitza ezin ditu erakunde terrorista batek bahitu. Gure errealitate politiko izugarri konplexuan, egoera eta erabaki eztabaidagarriak izaten dira noiznahi eta nonahi, baina horietako batek ere ez du hilketa justifikatzen. Unibertsitateak ezinbestean agertu behar du indarkeria politikoa erabiltzearen aurka, bere izatearen aurkakoa baita, unibertsitateak bultzatzen duen gizarte ereduan eta kultura ereduan ez baitago inolako zirrikiturik hilketa legitimatzeko.
3. Euskal Herriko Unibertsitateko Errektoretzak bat egiten du hurrengo egunetan deituak izango diren arbuio-adierazpenekin, batik bat unibertsitate-giroan izan daitezenekin.
Leioa, 2008ko martxoaren 7a
Dagoeneko atentuaren kontrako elkarretaratzeak deitu dituzte biharko Barrika eta Sopelako udalek
2008ko mar. 7a, 19:35
Prentsara ohar bana igorri dute Barrika eta Sopelako Udalek, gaur eguerdiko 13:30ak aldera Arrasaten jazo den Isaias Carrasco PSE-EEko zinegotzi ohiaren hilketa gaitzetsiz. Juan Jose Ezpeleta eta Imanol Garai tokian tokiko alkate jelkideek elkartasuna adierazi diete zinegotzi ohi arrasatearraren senide eta alderdikideei. Halaber, Eusko Jaurlaritzak eta Eudelek egindako deialdiarekin bat eginez, bihar eguerdian, Barrika eta Sopelako udaletxeen aurrean elkartzera deitu dituzte herritarrak. Bestalde, Euskal Herriko Unibertsitateko Errektoretzak ere gaitzespen oharra plazaratu du. Argazkian, Imanol Garai udal agintari sopeloztarra.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun