Antenen gaineko atzoko mintegiaz ez datoz bat Getxoko Udala eta Antena Ez

Erabiltzailearen aurpegia Ukberri 2008ko mar. 7a, 20:25
Areetako Andres Isasi musika eskolan atzo egindako telefonia antenei buruzko mintegia "oso positibotzat" jo du, gaurko prentsaurrekoan, Joseba Arregi Hirigintza zinegotzi getxoztarrak. Ia 80 lagunek parte hartu zuten saioan, "entzuleek 30 galdera baino gehiago egin zituen eta adituek, zehatzak ala orokorrak izan, guztiei eman zieten erantzuna", aipatu du udal agintariak. Antena Ez elkarteko kideek, ordea, atzoko mahaingurua "espero genuena baino okerragoa" izan zela adierazi dute. Aurretik egin bezala, tokiko arduradunek saioa "antenekin arazorik ez dagoela, dena zuzena dela eta auzokideen beldurrak oinarririk gabekoak direla esateko" erabili zutela kritikatu dute auzokideek. Gaurko prentsaurrekoan egin bezala, atzoko mintegian ere hainbat azalpen eman zituzten adituek, "ikerketa kualifikatu guztien arabera, uhin elektromagnetikoak osasunerako kaltegarriak ez" direla adieraziz. Argazkian, Imanol Landa alkatea eta Joseba Arregi Hirigintza zinegotzia atzoko mintegian.
Joseba Arregi Hirigintza zinegotziak aurreratu duenez, Getxon sakelako telefoniaren antenak jartzea ikertzeko sortutako lan taldea hilabete honetan bilduko dela berriro, "herritarren kezkei erantzuna emateko eta udalerrian antenak era kontrolatuan, baketsuan eta adostuan ipintzea lortzeko". “Hurrengo saioan sakelako telefoniako operadoreek epe laburrera izango dituzten beharrak jakitera emango dituzte eta gainontzeko parte hartzaileek sakelako telefoniako estazioak etorkizunean hedatzeko behar den ikerketa zehaztuko dute”, gaineratu duenez.
Jendartea Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun