Uribe Kosta eta Erandioko biztanleek, espainiar gisa erroldan onartuta egotekotan, Bizkaitik Madrilera, Espainiako Kongresu (argazkian) eta Senatura, joango diren zortzi diputatu eta lau senatari aukeratzeko bozketetan parte ahal izango dute gaur. Hautes-mahaietan, Kongresurako 21 zerrenda aurkituko dituzte bozkatzera doazen auzokideek, Eusko Abertzale Ekintzaren hautagaitza Espainiako Auzitegi Nazionalak eta Gorenak debekatu ostean. Espainiako Barne Ministerioak jakinarazi duenez, Bizkaiko bost hautes-mahai guztiak, 1.439, zabalik daude une honetan. Hego Euskal Herrian, guztira, 2.212.720 pertsonek 23 diputatu eta 16 senatari aukeratu ahal izango dute 20:00ak arte, azken sarekadek, tortura salaketek eta, batez ere, Isaias Carrascoren hilketak eta alderdien ilegalizazioek baldintzatutako hauteskundeetan. Lapurdi, Behe Nafarroa eta Zuberoari dagokienez, herriko etxe guztietan zinegotziak eta alkateak zein Paueko Kontseilu Nagusirako 21kantonamentik 11etan kontseilariak aukeratzeko hauteskundeen lehen itzulia izango da gaurkoa, 18:00ak arte.
Uribe Kostan eta Erandion bozkagai dauden zerrenden artean bost alderdi Espainiako muturreko eskumako alderdiak dira (Alternativa Española, FE de las JONS, Partido Familia y Vida, Alianza Nacional eta Democracia Nacional); beste launa Espainiazale amorratuak (PSE-EE, PP, UPD eta Ciudadanos) eta federalistak (Ezker Batua, Euskalerriko karlista Alderdia, POSI eta PCPE-EK) dira. Abertzaleak ere lau zerrenda ziren, baina EAErena debekatu ondoren EAJ, Aralar eta EArenak baino ez dira gelditu. Azkenik, arazo sektorialei erantzuna eman nahi dieten alderdiak (Berdeak, PACMA, eta PUM+J) eta sailkaezinak (Alderdi Humanista eta Alternativa Motor y Deporte) daude.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun