Areetako hizkuntza eskolan, 20 bat lagunek inguratu dituzte, lehenengo, Imanol Landa Getxoko alkatea eta, ondoren, Carlos Iturgaiz eurodiputatua, bozkatzera zihoazen unean. Besteak beste, "Iruzurrik ez!", "Demokrazia Euskal Herriarentzat!" eta abstentzioaren aldeko leloak irakur zitezkeen kartelak zeramatzaten horiek. Landaren kasuan ez da arazorik egon, EAJko jarraitzaile batek agirika egin dien arren. Iturgaizekin, ordea, PPkoak protestan zebiltzan lagunei bultzaka hasi zaizkie eta tentsio uneak bizi izan dira. Eurodiputatuak, gainera, nerbioak galdu eta "sasikumeak" deitzen hasi zaizkie abstentzioaren aldekoei, Marisa Arrue Getxoko PPko buru eta Espainiako Kongresurako Bizkaiko zerrendetan bigarrena alboan zuela. Hori 11:10ak aldera jaso da eta ez da identifikaziorik, ezta atxiloturik ere egon. Algortan, baina, 15 laguni eskatu dizkiete agiriak. Argazkian, Imanol Landa alkate getxoztarra bozkatzera zihoan unean.
Eguerdiak aldera hainbat hautesleku bisitatzen ibili dira, abstentzioaren aldeko eskuorriak banatuz, 15 lagun. Getxo I institututik irten eta Geroa ikastolarako bidea hartu dutenean, baina, Ertzaintzaren patrol bat parean gelditu eta guztiak identifikatu dituzte. Bestalde, Iturgaitzek "egongo direla jakin arren, horrelako jendemodua hauteslekura sartzea saihesteko neurririk ez hartzea" leporatu dio Eusko Jaurlaritzako Herrizaingo Sailari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun