"Bosteko" erakusketa ikusgai egongo da Leioan apirilaren 11ra arte
2008ko mar. 10a, 18:45
Gaur zabaldu dute Kultur Leioan “Bosteko 2008” erakusketa ibiltaria. XI. edizioan, Iñaki Cerrajeria eta Carlos Marcote artista arabarren margoak eta Patxi Cobo bizkaitarraren argazkiak egongo dira ikusgai bertan, apirilaren 11ra bitartean. Sarrera doakoa da eta honako ordutegietan ikus daiteke: astelehenetik ostiralera, 10:00etatik 14:00etara eta 17:00etatik 20:00etara; larunbatetan, 17:00etatik 20:00etara; eta igande eta jaiegunetan, 11:00etatik 14:00etara. Gainera, behin Leioan bukatuta, Itzubaltzeta / Romora eramango dute erakusketa. Apirilaren 29tik maiatzaren 17ra bitartean ikusi ahal izango da bertoko kultur aretoan. "Bosteko" erakusketa didaktiko, xume eta jende guztiak ulertzeko erraza izan nahi du, eta helburua du euskal arte garaikideko protagonisten lana ikusleei hurbiltzea. Gainera, "Bosteko"k arte garaikidea Bizkaiko Lurralde Historikoko hainbat herritara hurbiltzea du xede Zornotza, Arrigorriaga, Basauri, Getxo eta Leioako udalerrien lan koordinatuari eta Bizkaiko Foru Aldundiko Kultura Sailaren kolaborazioari esker. Argazkian, Marcoteren margoetako bat.Aurtengo ediziorako aukeratutako hiru artistek aintzat hartzeko moduko ibilbidea dute, eta Alicia Fernandez historialari eta arte kritikariak hautatu ditu. Carlos Marcotek (Agurain, Araba, 1950) errealismoz eta paisaia eta erretratuen sentikortasun handiz betetako pintura egiten du, eta Iñaki Cerrajeriak (Gasteiz, Araba, 1957), berriz, kolorearen indarrean, abstrakzioan eta keinuan oinarritutako konposizioak pintatzen ditu. Beste alde batetik, Patxi Coboren (Urtuella, Bizkaia, 1953) irudien abiapuntua lekuen gaineko esperientzia da; izan ere, sarritan, gizakiaren ekintzak eraldatu egiten ditu leku horiek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun