Zine politiko saioa eta kantautoreen kontzertua egongo dira aste honetan Itzubaltzeta gaztetxean
Ostiral honetan, martxoak 14, emanaldia eskainiko dute hainbat kantautorek Itzubaltzeta / Romoko Itzubaltzeta gaztetxean, Ez Jaun Ez Jabe talde libertarioak antolatuta, Horrenbestez, Tipico Pero Cierto bartzelonarra, Klaro Ke Si leioaztar mutila eta Entre Pitos y Flautas osatzen duten Gernikako bi neskak igoko dira gune autogestionatuko agertokira, 20:00etatik aurrera. Sarrerak 3 eurotan jarri dituzte. Izan ere, kolektiboaren autokudeaketarako behar du diru hori Ez Jaun Ez Jabek. Bestalde, Resumen Latinoamericano agerkariak antolatuta, zine politikoaren zikloa abiatuko da asteazken honetan, martxoak 12, Itzubaltzeta gaztetxean. Egun horretarako, gainera, "Atocha, El Pozo, Santa Eulalia... 13-M Donibane" izenburuko dokumentala aukeratu dute. Hain zuzen ere, orain 4 urteko martxoaren 11 eta 13 bitarteko egunetan gertaturikoaren zergaitiak eta ondorioak aztertzen ditu filmak. Besteak beste, Angel Berrueta hil zuen Espainiako polizia batek, Iruñean, martxoaren 11ko atentatuen testuinguruan. Etziko saioa 19:30ean hasiko da.
Zine politikoaren zikloak "laugarren boterea" delakoa, hau da, hedabideak hartu ditu gaitzat, martxoan zehar antolatutako hiru proiekzioetarako. Apirilean, berriz, Ameriketako Estatu Batuek (AEB) Latinoamerikako herrialdeetan duten esku sartzeaz jardungo dute. Aurreraegi joan gabe baina, martxoaren 23an, "911 Misteries" filma proiektatuko dute jatorrizko bertsioan (ingelesez) eta erdarazko azpitituluekin. Horrek 2001eko irailaren 11n AEBetan gertatutako atentatuaren gainean hedabideek zabaldutako bertsio kontrajarriak ditu hizpide. Azkenik, martxoaren 30an, Hugo Chavez Venezuelako presidentearen aurkako 2002ko apirileko estatu kolpeaz diharduen "La revolucion no sera transmitida" pelikula egongo da ikusgai. Aipatu bi hauek ere 19:30ean izango dira, Itzubaltzeta gaztetxean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun