Egunotan Eusko Jaurlaritzaren beste isun bat jaso du Getxoko herritar batek, 2007ko urriaren 5ean Areetan egindako mobilizazio batengatik, Uribe Kostako Amnistiaren Aldeko Mugimenduak Etengabe bitakoran salatu duenez. Aipatu egunean, "atxilotutako 23 Batasuneko kideen askatasuna, errepresioaren amaiera eta Euskal Herriarentzako demokrazia eskatzeko" hainbat mobilizazio egin ziren Uribe Kosta eskualdean eta Erandion. Besteak beste, Areetan, PSOEren egoitzaren aurrean elkartu ziren 60 bat herritar eta ertzainak bultzaka ibili ziren. Istiluak, baina, artez hasi eta bukatu dituzte ertzainek: manifestazioari pankarta kenduz, bi lagun identifikatuz eta haietariko bat atxilotzearekin mehatxatuz, beti ere pilota-jaurtigailuak eskuan izan dituztela. Horrenbestez, 300 euroko isuna heldu zaio horietako bati. AAMk nabarmendu duenez, denbora labur batean Getxo udalerrian jaso den bosgarren isuna da, guztira 1500 euro baino gehiago. Argazkian, getxoztar laguna identifikatu zuten egunean 190 pertsona batu ziren Algortan.
Izan ere, Aner Mimenza Getxoko preso gaztearen gurasoei gertatu bezala, Eusko Jaurlaritzaren beste isun bat jaso du orain gutxi Algortako herritar batek: 301 euroko isuna 2007ko maiatzaren 18an egin zen manifestazioan identifikatu zutelako. Egun horretan manifestazioa egin zuten Marian Perez del Rio (egun kalean) eta Txetxu Fernandez senar-emazte algortarrek espetxean 15 urte bete zutela salatu eta presoak etxean behar dutela aldarrikatzeko. Bestalde, urriaren 18an ere, Zigor Goikoetxea atxilotu zutenean, bere etxe aurrean elkartasuna adierazteko zegoen pertsona bat identifikatu eta, arakatu zutenean, 6 zentimetroko aihotzadun cutter bat izateagatik, Espainiako Poliziak beste 300 euroko isuna jarri zion. "Askotan aipatzen da Jaurlaritzaren aldetik Espainiako gobernuak agindutako errepresioa aplikatu behar izaten dutela legea betetzeko, baina isun hauetan ikusten den bezala Jaurlaritza bera da hemen ezker abertzalea zigortu eta baztertzeko asmotan dabilena. EAJk hauteskundeetan izan duen porrotaren ostean pentsatu beharko luke errepresioaren alde diharduen dinamika horrek nora eramango duen", adierazi du AAMk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun