"Hitzen" edizio jarraituetako informazioa bateratu eta gaurtik aurrera sarean den Hitza.info webgunea abiarazi dute tokian tokiko prentsa sustatzeaz arduratzen den Euskarazko Komunikazio Taldearen barneko Bertako Hedabideek. Euskarazko herri informazioaren atari garrantzitsuena bihurtzea da asmoa: bertan bilduko dituzte, alde batetik, "Hitzetako" 102 herrietako informazioa (Tolosaldekoak eta Leitza aldekoak, Urola Kostakoak, Donostiakoak, Lea-Artibaikoak eta Mutrikukoak, Busturialdekoak, Goierrikoak eta Oarsoaldekoak); bestetik, herri informazioaren inguruan lanean ari diren beste hainbat agerkari digitalen edukiak eta albisteak ere bilduko dituzte. Izan ere, Hernaniko (Gipuzkoa), Arrigorriagako (Bizkaia), Baztan eta Bortzirietako, Bidasoako, Iruñerriko eta beste hainbat herri eta eskualdetako informazioa ere izango da webgune berrian, "Ttipi-Ttapa", "Hernaniko Kronika", Bidasoa Media, Arrigorriagan Euskaraz, Nabarreria eta beste hainbat komunikabiderekin abiarazitako elkarlanari esker. UKBERRI.NETek ere begi onez ikusi zuen Bertako Hedabideek egindako gonbitea eta, horrenbestez, Uribe Kosta eta Erandioko albisteak ere egongo dira eskura webgune berrian. Hitza.info gaur aurkeztuko dute, 19:00etan, Donostiako Doka kafe antzokian. Argazkian, Goierriko Hitza berrituaren aurkezpena, azaroaren 8an / Goierriko Hitza.
Zenbait hilabete igaro dira herri informazioa lantzen duten euskarazko "Hitza" egunkariek webguneak berritu zituztenetik. "Izan ere, teknologia berriek goitik behera irauli dute kazetaritza egiteko modua, eta udazkenean "Hitzek" ezinbestekoa ikusi zuten erronka berriari erantzutea", diote Bertako Hedabideen arduradunek. Asmo horrekin berritu ziren zazpi "Hitzen" webguneak, beti ere edizio jarraituari, blogei, bideoei, argazkiei eta herritarrek bidalitako informazioari garrantzia emanez. "Hitzetako" 102 herrietara mugatu gabe, gainera, herri informazioaren inguruan lanean ari diren beste hainbat agerkari digitalen edukiak eta albisteak ere biltzea erabaki dute, komunikabide horiekin abiarazitako elkarlanari esker. Uribe Kosta eskualdea eta Erandiori dagokionez, UKBERRI.NET agerkaritik hartuko ditu berriak, "argitaratutako albiste garrantzitsuren bat herri informazioak egun horretan eman duen albiste nabarmenenetakoa dela irudituz gero", argitu dutenez. Hala ere, ezkerraldeko zutabean, herrien zerrendaren azpian, UKBERRI.NETera joateko esteka egongo da ikusgai uneoro.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun