Danimarka, Suedia, Espainia eta Txekiar Errepublikako taldea lehiatuko dira aurten Getxoko Jazzaldian
2008ko mar. 12a, 18:46
Dagoeneko aukeratu dituzte aurtengo Getxoko Jazzaldiaren lehiaketan parte hartuko duten taldeak, Getxoko Kultur Etxeak jakinarazi duenez. Aurten 50 bat taldek parte hartu dute aurreneko fasean eta, horien artean, honako lau hauek hartu ditu epaimahaiak: Flux (Danimarka), Kristian Brink Quartet (Suedia), Tutusaus Septet (Espainia) eta Ondrek Pivec Organic Quartet (Txekiar Errepublika). Horiek uztailaren 8tik 12ra joko dute lehiaketako lehen saria eskuratzeko, eta irabazlea berriro arituko da azken egunean. Sariei dagokienez, 3.000 euro jasoko dituzte txapeldunek eta diskoa grabatuko diete zuzenean. Bigarren sariari, berriz, 1.200 euro dagozkio eta, azkenik, bakarlaririk onenak 600 euro jasoko ditu. Sariez gain, irabazleek Hoeilaarteko (Belgika) eta Ibizako (Espainia) jazzaldietan parte hartuko dute, Getxo Jazzek horiekin duen akordioari esker. Argazkian, People Are Machines laukote daniarrak lortu zuen garaipena iaz.Oraingoan, Europako 16 herrialdetako taldek parte hartu dute lehiaketan. Espainiak, Alemaniak, Suediak, Holandak eta Suitzak aurkeztu dute talde kopururik handiena, Polonia, Danimarka, Txekiar Errepublika eta Errusiaren aurretik, besteak beste. Ohikoa denez, aukeratutako lau finalistek dirua jasoko dute, 900 eta 1.800 euro artekoa, bidaia, egile-eskubideak eta horrelakoak ordaintzeko. Egonaldia, berriz, antolatzaileek ordainduko dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun