Bolognaren aurkako adierazpenarekin bat egin dute Gizarte Zientzietako ikasleek
2008ko mar. 12a, 22:20
Ikasle Abertzaleek eta Eraldatu taldeak otsailaren 20an aurkeztutako Bologna Prozesuaren aurkako ikasle adierazpenari atxikitu zaizkio EHUko Leioa eta Erandioko campuseko unibertsitario ugari. Lehenengo ekimen bateratu modura, ikasgelategi aurrean elkarretaratzea egin dute Gizarte Zientziak eta Zuzenbide fakultateetako 9 ikasle-taldek eta maila pertsonalean bat egin duten beste hainbat neska-mutilek. "Ekimen anitz hau aurreko asteetan landutakoaren emaitza bezala hartu daiteke. Helburua fakultateko ikasgeletara iritsi eta borroka bateratu bat eramateko bultzada bat bilatzea izan da", adierazi dutenez. Gaurkoa "lehenengo pausutzat" jo dute ikasleek. Argazkian, Gizarte Zientzietako ikasleek gaur egindako kontzentrazioa / Gaztesarea.Adierazpenera atxikitu diren ikasle-taldeekin kontaktuan jarraitu eta beste ekimen batzuk egitea dute helburu, "azkenean unibertsitatean eztabaida sozial anitz bat emateko, bertan dauden estamentu guztietan". Euren hitzetan, "ezin da ahaztu Bologna prozesua unibertsitateko instituzioetatik inposatzen den prozesu bat dela. Gainera, hezkuntza enpresen eta merkatuaren logikaren menpe utziz, Europan nagusitzen ari den eredu neoliberal txikitzailearekin bat egiten du prozesu honek". "Hitza eskatzen" jarraituko dutela adierazi dute, baita "nahi ala ez" unibertsitatean eztabaida hori emango dela ohartarazi ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun